Máýlen Áshimbaev ornyqty damý maqsattaryna qatysty pikir bildirdi
«Ózderińizge belgili, osy aptada Parlament palatalarynyń birlesken otyrysynda Ornyqty damý maqsattarynyń iske asyrylýyna monıtorıng júrgizý jónindegi Parlamenttik komıssııa quryldy. Komıssııaǵa tóraǵalyq etý mindeti maǵan júkteldi. Búgin biz osy Komıssııanyń alǵashqy otyrysyna jınalyp otyrmyz. Jıynǵa Premer-Mınıstrdiń orynbasary – Qarjy mınıstri Erulan Jamaýbaev, basqa da Úkimet músheleri, Parlament depýtattary, Halyqaralyq uıymdardyń ókilderi jáne sarapshylar qatysyp otyr», - dedi M. Áshimbaev.
Senat tóraǵasy Birikken Ulttar Uıymy Ornyqty damý maqsattaryn 2015 jyly bekitkenin eske saldy.
«Qabyldanǵan barlyq 17 maqsat bir-birimen tikeleı baılanysty. Olar jekelegen elder men álemniń ózekti problemalaryn sheshýge arnalǵan. Osy qujatty oryndaýdy álemniń 200-ge jýyq eli ózine mindetteme etip aldy. Olardyń qatarynda Qazaqstan da bar. Soǵan baılanysty osy 7-8 jyldyń ishinde elimizde kóptegen jumys atqaryldy. Alaıda, osy aralyqta búkil álemge zardaby tıgen qıyndyqtar bolǵany bilgili. Bul rette, eń aldymen, eske pandemııa túsedi. Odan keıin de túrli jahandyq shıelenister tolastamaı otyr. Munyń bári ornyqty damý maqsattarynyń oryndalý qarqyny men sapasyna keri áserin tıgizip otyr», - dedi ol.
M. Áshimbaevtyń sózinshe, Birikken Ulttar Uıymynyń málimeti boıynsha, búginde álem elderiniń jartysynan kóbi atalǵan maqsattarǵa qol jetkize almaı keledi. Qazaqstannyń jaǵdaıyna keletin bolsaq, 2023 jylǵy Álemdik progress reıtınginde elimiz 166 memlekettiń ishinde 66-shy orynǵa turaqtady (2021 j. – 59 oryn, 2022 j. – 65 oryn).
«Bul pandemııaǵa deıingi kórsetkishten jaqsy bolǵanymen, keıingi jyldarda tómendeý tirkelip otyrǵanyn aıtýymyz kerek. Atap aıtqanda, sý resýrstarynyń azaıýyna jáne áleýmettik teńsizdikke qatysty mańyzdy túıtkilder bar. Basqa salalarda da sheshimin tappaǵan máseleler jeterlik. Sondyqtan bizge belgilengen ornyqty damý maqsattaryna qol jetkizý úshin tyń serpin qajet ekeni anyq. Olardy iske asyrýdyń ıgiligin eń birinshi Qazaqstannyń halqy kórýge tıis. Osyǵan oraı Prezıdentimiz Qasym-Jomart Kemeluly Toqaevtyń tapsyrmasy boıynsha arnaıy Parlamenttik Komıssııa qurylyp, jumysyn bastady. Aldaǵy ortaq jumystarymyz tabysty jáne nátıjeli bolady dep senemin», - dedi Senat spıkeri.
Budan buryn habarlanǵandaı, 20 maýsym kúni Senat pen Májilis depýtattary Parlament palatalarynyń birlesken otyrysynda Qazaqstannyń ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi parlamenttik komıssııanyń quramyn bekitti.
Oǵan senatorlar qatarynan Máýlen Áshimbaev, Olga Perepechına, Asqar Shákirov, Súıindik Aldashev, Nurtóre Júsip, Álı Bektaev, Nurlan Beknazarov, Sergeı Karplıýk, Aqmaral Álnazarova kirdi.
Komıssııa quramynda Májilis depýtattarynan Albert Raý, Nurtaı Sabılıanov, Aıan Zeınýllın, Pavel Kazantsev, Ashat Raqymjanov, Asqar Sadyqov, Erlan Stambekov, Gaýhar Tanasheva jáne Dınara Shúkijanova bar.
Atalǵa komıssııanyń tóraǵasy bolyp Senat spıkeri Máýlen Áshimbaev saılandy.