Máýlen Áshimbaev Nur-Sultan men Almaty qalalaryndaǵy zańsyz sherýlerge pikir bildirdi
«Nur-Sultan, Almaty jáne ózge de birqatar qalada ótken sherýlerdegi jaǵdaı birkelki. Bizdiń azamattarymyzdyń pikir aıtý, jınalý quqyǵy bar. Biraq, munyń barlyǵy da elimizdiń zańnamasyna sáıkes oryn alýy tıis. Eger mundaı jaıt bolmasa, biz zańda ustanbasaq, belgilengen erejelerge boısunbasaq, onda munyń búkil qoǵam úshin teris saldary bolady», - dedi Máýlen Áshimbaev OSK-degi brıfıng barysynda BAQ ókilderiniń saýalyna oraı.
Sonymen qatar ol Almatydaǵy marafon barysyndaǵy aktsııaǵa qatysty da pikirin bildirdi.
«Almatydaǵy marafon barysynda birneshe jastyń júzege asyrǵan aktsııasyna qatysty máseleniń eki jaǵy bar ekendigin atap ótkim keledi. Mazmundyq jáne ótkizý jaǵy bar. Mazmundyq jaǵynan keler bolsaq, jastar elimizdiń zańnamasyna, halyqaralyq normalarǵa sáıkes ashyq, ádil saılaý ótkizýdi jaqtaıtyn bolsa, onda bul bizdiń partııamyzdyń jaqtap otyrǵan ustanymy», - dedi ol.
Máýlen Áshimbaev Prezıdenttiń bul saılaýdy ashyq, ádil jáne elimizdiń zańnamasyna saı ótkizý týraly tapsyrmasy bar ekendigin eske saldy.
«Sol sebepti mazmundyq jaǵynan keler bolsaq, saılaýdyń ádil ótýine qarsy bolatyn adamdar joq deýge bolady. Adamdardyń qatysýymen, kóptegen qala turǵyndarynyń qatysýymen ótip jatqan ózge shara barysynda jasalǵan mundaı áreketter, taǵy da qaıtalap aıtamyn, Qazaqstan zańyna sáıkes júzege asyrylýy tıis. Eger biz ony ustanbasaq, onda bul destrýktıvti tendentsııanyń kúsheıýine alyp keledi. Eldegi belgili bir teris tendentsııa kúsheıe túsedi. Al bul eshkimge qajet emes», - dedi Máýlen Áshimbaev.