Máýlen Áshimbaev «Nur Otandy» kreatıvti partııaǵa aınaldyrýdy kózdeıdi
«Memleket basshysynyń tapsyrmasy boıynsha biz partııany jańartý jumysyn bastadyq. Negizgi maqsat - «Nur Otandy» zaman talabyna saı kreatıvti partııaǵa aınaldyrý. Ondaı partııa xalyq úshin, xalyq arasynda jumys istep, eldiń qoldaýyna ıe bolýy shart. Osy oraıda biz partııa jumysyndaǵy bıýrokratııany joıyp, barynsha ashyq bolýdy qalaımyz. Partııa basshylyǵynyń esigi qarapaıym qyzmetkerlerge de, xalyqqa da árdaıym ashyq bolýy qajet», - dedi M.Áshimbaev búgin úkimettik emes uıymdardyń ózara is-qımyly jónindegi keńeste.
Onyń aıtýynsha, xalyqqa barynsha jaqyn bolý úshin partııa úkimettik emes uıymdarmen birlesip jumys isteýge basymdyq berip otyr. Sebebi qoǵamdyq uıymdar eldiń ózekti máselelerin jaqsy biledi.
«Men ózim úkimettik emes uıymdardyń ókilderine úlken qurmetpen qaraımyn. Óıtkeni dál osy salada qoǵam ómirine beıjaı qaraı almaıtyn naǵyz patrıot azamattar jumys isteıdi. Biz bilemiz, keıbir úkimettik emes uıymdardy qarjylandyrý kólemi kóp emes. Kóbisi óz qaltasynan aqsha salýǵa májbúr. Jalpy, kez kelgen elde úkimettik emes uıymdar azamattyq qoǵamdy qalyptastyrýdyń katalızatory bolyp sanalady. Sonyń negizinde xalyqtyń ál-aýqaty da, memlekettik damý da bar. Sondyqtan «Nur Otan» qoǵamdyq uıymdarmen tyǵyz jumys jasaıtyn bolady», - dep atap kórsetti M.Áshimbaev.
Aıta ketken jón, búginde «Nur Otan» partııasy san alýan salada 20-dan astam áleýmettik jobany qolǵa aldy. Sonyń ishinde respýblıka boıynsha myńdaǵan IT-synypty ashý, aqparattyq texnologııalar boıynsha maman daıarlaý ortalyqtaryn ashý, biryńǵaı elektrondy kitapxana bastamasyn aıaǵyna deıin jetkizý, mektepterde sapaly tamaqtandyrý, aýylda jerlerde sporttyq ınfraqurylymdy damytý, ardagerler men múgedekterdi qoldaý jáne taǵy basqa jobalar bar. Oǵan qosa, partııa Qazaqstannyń úzdik áleýmettik jobalaryna arnalǵan baıqaýdy jarııalady. Kúzde atalǵan konkýrstyń qorytyndysy shyǵarylady. Al úzdik jobalarǵa qarjylaı qoldaý jasalady.
«Osy oraıda biz úkimettik emes uıymdarmen birlese otyryp, qoǵamnyń ózekti máselelerin sheshýge múddelimiz. Parlamentte partııanyń fraktsııasy bar. Sol arqyly biz tıisti zańdarǵa ózgeris engizip, áleýmettik máselelerdi sheshýge daıynbyz. Barlyq usynystardy qaraıtyn bolamyz», - deıdi M.Áshimbaev.