Máýlen Áshimbaev: Naýryz - eldik pen yntymaqtyń, birlik pen berekeniń merekesi

NUR-SULTAN. QazAqparat - Parlament Senatynyń tóraǵasy Máýlen Áshimbaev Facebook áleýmettik jelisinde Naýryz meıramymen quttyqtady, dep habarlaıdy QazAqparat.

«Qurmetti dostar!

Barshańyzdy Ulystyń uly kúni – Naýryz meıramymen shyn júrekten quttyqtaımyn!

Naýryz – jańarý men jańǵyrýdyń bastaýy. Bul kún eldik pen yntymaqtyń, birlik pen berekeniń merekesi.

Halqymyz áz-Naýryzdy qashanda jaqsylyq pen jańashyldyqtyń jarshysy retinde úlken úmitpen qarsy alady. Ultymyzdyń ejelden qalyptasqan salt-dástúri osy kúnderde keńinen dáripteledi.

Tirshilik ataýly túgel qaıta jandanatyn osyndaı sátte elimizdiń damýdyń jańa kezeńine qadam basýy sımvoldyq mánge ıe. Shyn máninde, halyq Memleket basshysynyń Joldaýyn jańa Qazaqstannyń bastaýy retinde qabyldap jatyr.

Sondyqtan Jańa jylymyz jańa maqsattar men mindetter iske asatyn tabysty jyl bolady dep úmittenemiz. Jyl jaqsylyǵymen kelsin.

Barshańyzdy Ulystyń uly kúnimen quttyqtaı otyryp, ár otbasyna amandyq, qut-bereke jáne jańa jetistikter tileımin!

Áz-Naýryzda aıtylar aq jarma tilekter qabyl bolyp, arman-murattarymyzǵa jete bereıik. Ulys oń, aq mol bolsyn, aǵaıyn! « delingen habarlamada.