Máýlen Áshimbaev Mysyrdyń Qazaqstandaǵy Elshisimen kezdesti
Taraptar eki eldiń túrli baǵyttar boıynsha budan bylaıǵy yntymaqtastyǵynyń keleshegin talqylady.
«Biz aldaǵy jyly naýryz aıynda elderimiz arasyndaǵy dıplomatııalyq qatynastardyń ornaǵanyna 30 jyl tolýyn atap ótemiz. Osy jyldar ishinde birlesken kúsh-jigerdiń arqasynda Qazaqstan-Egıpet dostyǵynyń, ózara túsinistigi men tabysty yntymaqtastyǵynyń berik irgetasy qalandy. Eki eldiń syrtqy saıası mekemeleri arasynda baılanystar jolǵa qoıyldy, saýda-ekonomıkalyq yntymaqtastyqty arttyrý úshin jaqsy negizder jasaldy, sharttyq-quqyqtyq baza nyǵaıa tústi», - dep atap ótti Máýlen Áshimbaev.
Senat tóraǵasy áńgime barysynda elimizdiń dinaralyq dıalogty jahandyq deńgeıde ilgeriletý jáne Álemdik jáne dástúrli dinder kóshbasshylarynyń sezderin ótkizý jónindegi kúsh-jigerge qoldaý bildirgeni úshin Mysyr tarapyna alǵys aıtty.
Taraptar sondaı-aq parlamentaralyq baılanystardy odan ári nyǵaıtý máselelerin de talqylady.
«Bizdiń elderimizdiń parlamentteri ekijaqty qarym-qatynastardy nyǵaıtýda eleýli ról atqaryp keledi. Senatta ótken jyly Mysyrdyń zań shyǵarýshy organymen yntymaqtastyq toby quryldy. Biz parlamentaralyq baılanystardyń jaqsy qarqynyn saqtaýǵa jáne Mysyr parlamentshilerimen syndarly jumys júrgizýge múddelimiz», - dedi Máýlen Áshimbaev.
Palata tóraǵasy kezdesý sońynda Qazaqstan Parlamentiniń Senaty ekijaqty qarym-qatynastardy nyǵaıtýǵa belsendi túrde yqpal etetinin atap ótti.