Máýlen Áshimbaev múmkindigi shekteýli balalardy Bilim kúnimen quttyqtady

NUR-SULTAN. QazAqparat – Qazaqstan boıynsha myńdaǵan oqýshy búgin mektep tabaldyryǵyn attady. Solardyń ishinde erekshe qamqorlyqty qajet etetin 50-ge tarta bala elordadaǵy №1 mektep-ınternattyń birinshi synybyna bardy, dep habarlaıdy QazAqparat tilshisi.

№1 mektep-ınternatta qazirgi tańda 500-ge tarta bala oqyp jatyr.

Memleket basshysy Qasym-Jomart Toqaevtyń tapsyrmasymen bilim ordasynyń ustazdary, oqýshylary men ata-analaryn Prezıdenttiń kómekshisi Máýlen Áshimbaev quttyqtap qaıtty.

«Memleket basshysy atap ótkendeı, múmkindigi shekteýli adamdarǵa qamqorlyq kórsetý – memlekettik organdardyń jáne árbirimizdiń jumysynyń basym baǵyttarynyń biri bolýy kerek. Erekshe qamqorlyqty qajet etetin balalarǵa barlyq jaǵdaı jasalyp, sapaly bilim berilýi tıis. Olar áleýmetke sińip, damý dańǵylynan qalmaýy qajet. Dál osyndaı amal-ádisti iske asyrý bizdi shynynda da, naǵyz damyǵan qoǵam ekenimizdi aıqyndaı túsedi», - dedi Máýlen Áshimbaev Facebook-te.

Prezıdenttiń kómekshisi bilim salasyndaǵy zamanaýı reformalar balalardyń synı oı-tanymyn jetildirip, aqparatty taldaý daǵdysyn damytýy tıis ekenin sóz etti. Ol úshin qazaqstandyqtar muǵalimderge degen qarym-qatynastaryn ózgertýi kerek.

«Biz eń sátti degen reformalardyń ózi tájirıbe júzinde muǵalimniń basyn aýyrtatyn áýrege aınalyp ketetinin bilemiz. Aýqymdy júkteme, bitpeıtin kúızelis, jetkiliksiz aılyq, oǵan qosa jumystan tys qaıdaǵy bir sharalarǵa shapqylaý – bul bizdiń pedagogtardyń kúndelikti kórip júrgen isi», - dedi ol.

Buǵan qosa Máýlen Áshimbaev tamyz konferentsııasyndaǵy Qasym-Jomart Toqaevtyń sózin tilge tıek ete kele, bul máselelerdiń bári de sheshiletinin aıtyp ótti.

«Aılyqtyń eki ese artýy,kásibı ósimge jasalǵan jaǵdaı, qosymsha eńbek demalysy men basqa da sharalar pedagogtardy jigerlendire túseri sózsiz», - dedi ol.