Máýlen Áshimbaev kópbalalaly otbasyna 1 mln teńgeniń sertıfıkatyn tapsyrdy
Eske sala keteıik, osyǵan deıin habarlaǵanymyzdaı «Nur Otan» partııasy tóraǵasynyń birinshi orynbasary Máýlen Áshimbaev jumys saparymen Kókshetaý qalasynda boldy. Sapar barysynda Máýlen Áshimbaev «Nur Otan» partııasy Aqmola oblystyq fılıalynyń kezekten tys HHHІ konferentsııasyna qatysyp, partııanyń oblystyq fılıalynyń jańadan saılanǵan tóraǵasyna kýálik tapsyrdy.
Sonymen qatar, partııa tóraǵasynyń birinshi orynbasary «Nur Otan» partııasynyń oblystyq fılıalynda «Halyqqa kómek» jobasy aıasynda jańasha ekpin alǵan qoǵamdyq qabyldaý bólmesiniń jumysymen tanysty.
«Halyqqa kómek» - tikeleı Elbasynyń tapsyrmasymen qolǵa alynǵan joba. Sondyqtan, azamattardyń ótinishterine erekshe mán berip, belsendiligimizdi odan ári arttyramyz. Ár ótinish nazardan tys qalmaı, tıisti jumystar júrgiziledi. Bizdiń basty qaǵıdamyz - halyqty alańdatqan máselelerdi oń sheship, olarǵa bir jerde jáne dereý qyzmet kórsetý», - dedi Máýlen Áshimbaev.
Partııa tóraǵasy anyqtap bergen mańyzdy basymdyqtardyń biri - «Baqytty otbasy» jobasy. Bul bastama tikeleı kópbalaly jáne áleýmettik az qamtylǵan otbasylarǵa júıeli qoldaý kórsetýge baǵyttalǵan. Osy joba sheńberinde Máýlen Áshimbaev Kókshetaý qalasyndaǵy kópbalaly Qaqjanovtar otbasynda bolyp, áleýmettik jaǵdaıymen tanysty. Bul otbasy tórt bala tárbıelep otyr. Ókinishke qaraı, olardyń ekeýi naýqas. Buǵan deıin bul otbasy eki bólmeli páterleriniń qalǵan somasyn ótep, tolyǵymen satyp alý úshin partııadan qoldaý suraǵan eken. Partııa tóraǵasynyń birinshi orynbasary bul otbasyna 1 mıllıon teńgeniń sertıfıkatyn tapsyrdy.
Sapar sońynda Máýlen Áshimbaev Kókshetaý qalasynda sý tasqyny oryn alǵan vokzal mańy shaǵyn aýdanynyń turǵyndarymen kezdesti. Oblys ákimdiginiń málimeti boıynsha, qazirgi tańda oblys ortalyǵynda sý tasqynyna baılanysty jaǵdaı turaqtalǵan. Tótenshe jaǵdaımen kúresý úshin arnaıy tehnıkalar men jeke quramnyń 80 adamy jumyldyrylyp, 2000 tekshe metrden astam sý soryldy.
Atalmysh máselege baılanysty Máýlen Áshimbaev partııanyń jergilikti fılıalyna tótenshe jaǵdaımen kúres jumystaryn baqylaýda ustap, zardap shekken ár azamatqa memleket tarapynan beriletin mindetti kómektiń kórsetilýin qadaǵalaýdy tapsyrdy.