Máýlen Áshimbaev: Qazaqstandyqtardy tili men dinine qaraı kemsitýge jol berilmeıdi
Bul týraly QR Prezıdenti Ákimshiligi basshysynyń birinshi orynbasary Máýlen Áshimbaev aıtyp berdi.
«Eldegi beıbitshilik pen kelisim memleket úshin mańyzdy basymdyq bolyp qala beredi. Bálkim, qandaı da bir maqsattar men mindetter kún tártibinen túsýi múmkin. Biraq, memlekettik organdar úshin ultaralyq kelisimdi, beıbitshilik jáne qoǵamdyq qaýipsizdikti saqtaý - árqashan basty mindet sanalady, ony iske asyrýǵa memlekettiń barlyq resýrsy baǵyttalady. Árıne, elimizde kóptegen máseleler bar. Biraq, sonymen birge, beıbitshilik pen kelisimniń de bizdiń damýymyz ben azamattardyń qaýipsizdiginiń negizgi faktorlary ekenin túsinemiz.», - dedi M.Áshimbaev elordada etnosaıasattyń ózekti máseleleri týraly dóńgelek ústelde.
Onyń aıtýynsha, etnıkaaralyq qarym-qatynastar salasy memlekettik saıasattyń negizi bolyp qala beredi.
«Qazaqstan azamattaryn tiline, dinine nemese áleýmettik jaǵdaıyna baılanysty kemsitýge jol bermeý turaqty konstıtýtsııalyq norma bolyp qala beredi. Azamattarymyzdyń bedelin túsirýge, sonyń ishinde etnıkalyq belgilerge sáıkes kemsitýge baǵyttalǵan kez kelgen áreketti tıisti organdar qatań túrde toqtatady», - dedi M. Áshimbaev.
Buǵan deıin Máýlen Áshimbaev Qordaı aýdanynda bolǵan qaıǵyly oqıǵalar jóninde pikir bildirgen edi.