Máýlen Áshimbaev: Qańtarda qaza bolǵandardyń rýhyna taǵzym etý – azamattyq paryz

ASTANA. QazAqparat - Parlament Senatynyń tóraǵasy Máýlen Áshimbaev bir jyl burynǵy Qańtar oqıǵasy jaıynda pikir bildirdi, dep habarlaıdy QazAqparat.

«Búgin Qasiretti qańtar oqıǵasyna bir jyl tolyp otyr. Eldigimizge qaýip tóndirgen bul oqıǵa tarıhymyzdyń qaıǵyly paraǵy retinde jazyldy. Sol kezde sherýge shyqqan halyqty óz múddelerine paıdalanǵysy kelgen qylmysty toptyń maqsaty qandaı bolǵany qazir anyqtalyp jatyr. Olar arandatý arqyly el irgesine syzat túsirip, jymysqy áreketterin iske asyrýdy kózdedi. Alaıda, eldiń birligi men Memleket basshysy Qasym-Jomart Kemeluly Toqaevtyń batyl sheshimderiniń arqasynda biz bul syn-qaterdi eńserip, keshendi reformalardy qolǵa aldyq. Sonyń aıasynda halyqtyń ádilettilikke degen talaby memlekettik saıasattyń negizgi tiregine aınaldy», - dep atap ótti Senat spıkeri.

Máýlen Áshimbaevtyń paıymynsha, qazirgi tańda ádilettilik qaǵıdasyn ómirdiń barlyq salasyna engizý úshin tabandy jumys júrgizilip jatyr.

«Osy ortaq maqsatty iske asyrýda bizge ult bolyp uıysý qajet. Bul – memlekettilikti nyǵaıtý jáne qasiretti kúnderdiń qaıtalanbaýy úshin asa mańyzdy mindet. Shyn máninde, biz osy oqıǵany árdaıym sanada saqtap, odan sabaq alýǵa tıispiz. Qańtarda qaza bolǵandardyń rýhyna taǵzym etý – bizdiń azamattyq paryzymyz. Bul – eńseli eldiktiń jáne bekem birliktiń belgisi. Endi tarıhymyzda mundaı qaıǵyly oqıǵalar eshqashan qaıtalanbasyn», - deıdi Máýlen Áshimbaev.