Máýlen Áshimbaev Izraıl Knessetiniń spıkerimen parlamentaralyq yntymaqtastyqty talqylady

IERÝSALIM. QazAqparat - Senat tóraǵasy Máýlen Áshimbaev bastaǵan Parlamenttiń bir top depýtaty Izraılge saparmen keldi. Sapar barysynda Máýlen Áshimbaev Knesset spıkeri Amır Ohanamen kezdesip, eki el arasyndaǵy parlamentaralyq yntymaqtastyqty odan ári nyǵaıtý máselesin talqylady. QazAqparat bul týraly Senattyń baspasóz qyzmetine silteme jasap habarlaıdy.

Óz sózinde Senat tóraǵasy Izraıl Qazaqstannyń Taıaý Shyǵystaǵy mańyzdy seriktesteriniń biri ekenin aıtty. Sondaı-aq ol parlamentaralyq yntymaqtastyqty odan ári jandandyrýdyń mańyzdy ekenine nazar aýdaryp, zań shyǵarý qyzmeti boıynsha ózara is-qımyldy damytý jónindegi pikirimen bólisti.

«Qazaqstan Parlamenti men Izraıl Knesseti arasyndaǵy yntymaqtastyq ekijaqty qarym-qatynastyń ajyramas bóligi ekeni sózsiz. Biz úshin Izraıldiń zań shyǵarý qyzmetindegi, onyń ishinde áleýmettik-ekonomıkalyq jáne ınnovatsııalyq damýdy quqyqtyq turǵydan qamtamasyz etý, parlamenttik baqylaýdy júzege asyrý baǵytyndaǵy tájirıbesi mańyzdy. Aldaǵy ýaqytta osy jáne basqa da salalar boıynsha tájirıbe almasýǵa múddelimiz. Bul rette Senat pen Knessettiń salalyq komıtetteri men dostyq toptary arasyndaǵy baılanysty nyǵaıtýdyń bereri mol ekeni anyq», – dedi Máýlen Áshimbaev.

Kezdesý barysynda elimizde Memleket basshysy Qasym-Jomart Toqaevtyń bastamasymen júrgizilip jatqan aýqymdy saıası reformalardyń nátıjeleri de sóz boldy.

Óz kezeginde Knesset spıkeri Amır Ohana Qazaqstanda qolǵa alynǵan qoǵamdyq-saıası ózgeristerdi joǵary baǵalap, aldaǵy ýaqytta barlyq baǵyt boıynsha yntymaqtastyqty keńeıtýge múddeli ekenin bildirdi.

Sonymen qatar Máýlen Áshimbaev eki el arasyndaǵy saýda-ekonomıkalyq jáne mádenı-gýmanıtarlyq baılanystyń áleýeti zor ekenin atap ótti. Senat tóraǵasy bul rette tikeleı sheteldik ınvestıtsııalardy tartý máselesine erekshe nazar aýdardy.

«Qazaqstanda Memleket basshysynyń bastamasymen ulttyq ekonomıkany ártaraptandyrýǵa arnalǵan aýqymdy reformalar júrgizilip jatyr. Sonyń aıasynda sheteldik ınvestorlar úshin qolaıly jaǵdaı jasaýǵa basa mán berilip, tıisti jumys atqarylýda. Osy oraıda biz aýyl sharýashylyǵy, jasyl energetıka, medıtsına salalaryndaǵy jobalardy ızraıldik kompanııalarmen birlesip iske asyrýǵa múddelimiz. Qazaqstan jer kólemi boıynsha álemde toǵyzynshy orynda tur. Bizge osy aýmaqty ıgerý jáne aýyl sharýashylyǵyn damytý úshin jańa tehnologııalar qajet», – dedi Palata spıkeri.

Sondaı-aq suhbat kezinde Izraıldiń sýdy tuşylandyrý qondyrǵylaryn salý, sýdy baqylaý jáne tsıfrlyq esepke alý, sý sharýashylyǵyn damytý máselelerindegi tájirıbesi sóz boldy. Qazaqstan Parlamentiniń depýtattary osy baǵyttaǵy ozyq úlgini zerdeleý úshin Izraıldi aýyz sýmen qamtamasyz etetin memlekettik kompanııanyń jumysymen tanysty. Odan bólek, búkil el boıynsha sý qubyry jelisin basqarýshy mekemeniń qyzmetine nazar aýdardy.