Máýlen Áshimbaev Indonezııa parlamenti palatasynyń vıtse-spıkerimen kezdesti

ASTANA.QazAqparat - Senat Spıkeri Máýlen Áshimbaev Indonezııa Halyqtyq konsýltatıvtik kongresi Óńirler ókilderi keńesi tóraǵasynyń orynbasary Nono Samponomen kezdesti. Kezdesýde taraptar ekijaqty yntymaqtastyqty jáne parlamentaralyq baılanysty odan ári nyǵaıtý máselelerin talqylady.

Óz sózinde Máýlen Áshimbaev bıyl Qazaqstan men Indonezııa arasyndaǵy dıplomatııalyq qatynastyń ornaǵanyna 30 jyl tolǵanyn jáne kezdesýdiń osyndaı mereıli kezeńde ótip otyrǵanyn atap ótti. Sondaı-aq ol ózara is-qımyldy parlamentaralyq deńgeımen birge halyqaralyq uıymdar aıasynda da arttyrýdyń mańyzdy ekenin aıtty.

«Biz Indonezııamen parlamentaralyq yntymaqtastyqty damytýǵa múddelimiz. Osy rette konstıtýtsııalyq reformalar júrgizý jáne olardy zańnamalyq turǵydan qamtamasyz etý baǵytyndaǵy qazaqstandyq tájirıbeni zerdeleý úshin ındonezııalyq depýtattar Astanaǵa arnaıy kelgenin atap ótken jón. Bul – Parlamentterimizdiń ózara tıimdi yntymaqtastyǵynyń jarqyn úlgisi. Parlamentaralyq Odaq, Azııa Parlamenttik Assambleıasy sııaqty halyqaralyq uıymdar aıasynda da baılanysymyzdy nyǵaıtýdyń mańyzy zor. Bul sapar elderimiz arasyndaǵy parlamentaralyq yntymaqtastyqty nyǵaıtýǵa tyń serpin beredi dep senemin», – dedi Máýlen Áshimbaev.

Sonymen qatar Senat Tóraǵasy Memleket basshysynyń bastamasymen elimizde júrgizilip jatqan reformalarǵa toqtaldy. Odan bólek, suhbattasýshylar saýda-ekonomıkalyq, ınvestıtsııalyq jáne gýmanıtarlyq baılanysty keńeıtý máselelerine nazar aýdardy. Kezdesý barysynda Indonezııa astanasyn Nýsantara qalasyna kóshirý jáne osy baǵyttaǵy Qazaqstannyń oń tájirıbesi de áńgimege arqaý boldy.

Óz kezeginde Nono Sampono kezdesý úshin Máýlen Áshimbaevqa alǵysyn bildirip, Indonezııa Qazaqstanmen baılanysty nyǵaıtýǵa jáne parlamentaralyq ózara is-qımyldy arttyrýǵa múddeli ekenin jetkizdi.