Máýlen Áshimbaev: Halyqty alańdatqan máselelerdi sheshý - mindetimiz

KÓKShETAÝ. QazAqparat - «Halyqqa kómek» jobasy Aqmola oblysynda erekshe qarqynmen júzege asyrylýda. Osy baǵyttaǵy jáne Elbasy partııa sezinde anyqtap bergen basqa da basymdyqtar boıynsha atqarylyp jatqan jumystarmen tanysý úshin «Nur Otan» partııasy Tóraǵasynyń birinshi orynbasary Máýlen Áshimbaev atalǵan óńirge arnaıy bardy, dep habarlaıdy QazAqparat.

Partııanyń Feısbýktegi resmı paraqshasynda jarııalanǵan aqparatqa sáıkes, sapar barysynda ol partııa oblystyq fılıalynyń qoǵamdyq qabyldaý bólmesinde bolyp, joba aıasynda qolǵa alynǵan Biryńǵaı áleýmettik tereze júıesiniń qyzmetine nazar aýdardy. Atalǵan júıeniń iske qosylǵanyna kóp ýaqyt óte qoımasa da elimiz boıynsha oń nátıjesin berýde. Sonyń ishinde Aqmola oblysyn erekshe atap ótken jón. Óıtkeni óńirde áleýmettik tereze arqyly 431 ótinish kelip túsip, onyń 43 paıyzy dereý oń sheshimin tapqan.

Sondaı sheshimderdiń biri Máýlen Áshimbaevtyń qatysýymen sheshildi. Naqty aıtqanda, qyzynyń oqý aqysy úshin kómek suraı kelgen kóp balaly anaǵa qajetti somada qarjylaı qoldaý kórsetildi. Sondaı-aq, onyń páter jaldap turatyny eskerilip, baspana máselesi de qaralyp, oblys basshylyǵy tarapynan zań aıasynda tıisti jumystar júrgiziletin boldy.

«Halyqqa kómek» tikeleı Elbasynyń tapsyrmasymen qolǵa alynǵan joba. Sondyqtan azamattardyń ótinishterin aıaqsyz qaldyrmaı, belsendi jumys isteýimiz kerek. Óıtkeni halyqty alańdatqan máselelerdi oń sheship, dereý qyzmet kórsetý - bizdiń basty mindetimiz», - dedi M.Áshimbaev.

Sonymen qatar, ol Kókshetaý qalasyndaǵy Qaqjanovtar otbasyna arnaıy bardy. Bul otbasy tórt bala tárbıelep otyr. Ókinishke qaraı, olardyń ekeýi sal aýrýyna shaldyqqan. Buǵan deıin otbasy memlekettik baǵdarlamamen jalǵa alǵan eki bólmeli páterleriniń qalǵan somasyn ótep, tolyǵymen satyp alý úshin partııadan qoldaý suraǵan bolatyn. «Baqytty otbasy» jobasy aıasynda atalǵan másele oń sheshimin tapty.

«Bul bastama da Elbasynyń tikeleı baqylaýynda. Óıtkeni kóp balaly otbasylarǵa júıeli qoldaý kórsetý memleketimizdiń negizgi basymdyǵy bolyp tabylady», - dedi M.Áshimbaev.