Máýlen Áshimbaev: Eldiń damýy ekonomıkaǵa ǵana emes, saıası júıege de baılanysty

NUR-SULTAN. QazAqparat - Memleket basshysy Táýelsizdik kúni qarsańynda sóılegen sózinde elimizde mańyzdy reformalar jalǵasatynyn aıtqan edi. Máýlen Áshimbaev «Qazaqstan» ulttyq telearnasyna bergen suhbatynda osy máselege toqtaldy, dep habarlaıdy QazAqparat.

«Prezıdentimizdiń bul málimdemesi memlekettik damýda barlyq salany qamtý kerektigin kórsetedi. Tek ekonomıka nemese áleýmettik salamen shektelmeı, saıasatta da mańyzdy reformalardy júzege asyrýymyz kerek. Ol partııalardyń damýyna qatysty nemese adamdardyń quqyqtaryn júzege asyrýǵa baılanysty bolýy múmkin. Memleket basshysy ony ýaqyty kelgen kezde naqty aıtady», – dedi Senat Tóraǵasy.

Sonymen qatar ol qazirgi tańda eldik máselede kóp dúnıe saıası júıege baılanysty ekenin aıtty.

«Qazirgi tańda saıası reformalardyń mańyzy zor. Eldiń damýy tek ekonomıkaǵa baılanysty emes. Kóp nárse saıası júıege jáne memlekettik basqarýǵa baılanysty. Sondyqtan aldaǵy ýaqytta bul baǵyttarda naqty sharalar qolǵa alynatyny sózsiz. Senat óz tarapynan ol reformalardy júzege asyrýǵa kerekti zańdardy sapaly jáne ýaqtyly qabyldaıtyn bolady», – dedi Máýlen Áshimbaev.

Suhbat barysynda Táýelsizdikti saqtaýdyń mańyzy jáne sybaılas jemqorlyqpen kúrestiń el damýyndaǵy róli jóninde keńinen sóz boldy.

Odan bólek, Senat Tóraǵasy joǵary palatynyń bıylǵy atqarǵan jumystaryna, qabyldanǵan zańdardyń mańyzyna jáne aldaǵy maqsat-mindetterge toqtalyp ótti.