Máýlen Áshimbaev EQYU-nyń BAQ bostandyǵy jónindegi ókilimen kezdesti
Kezdesý barysynda Senat spıkeri Qazaqstan EQYU-nyń qaýipsizdik, onyń ishinde sóz bostandyǵyn qamtamasyz etý jónindegi negizgi baǵyttaryn ilgeriletýge múddeli ekenin atap ótti.
«EQYU-nyń Astana deklaratsııasy qabyldanǵaly beri 10 jyl ýaqyt ótti. Bul qujatta Eýroatlantıkalyq jáne Eýrazııalyq qoǵamdastyq elderi úshin qaýipsizdiktiń bólinbeıtindigi týraly negizgi tezıs jazylǵan. Qazaqstan EQYU qabyldaǵan qaýipsizdiktiń negizgi úsh baǵyty: áskerı-saıası, ekonomıkalyq-ekologııalyq jáne gýmanıtarlyq salalardyń mańyzdylyǵyn únemi basty nazarda ustap keledi. Sondyqtan biz sóz bostandyǵyn qamtamasyz etý jáne BAQ máselelerine erekshe mán beremiz», – dedi Máýlen Áshimbaev.
Sonymen qatar Senat tóraǵasy elimizde azamattardyń sóz bostandyǵy boıynsha quqyqtaryn qamtamasyz etýdi odan ári jetildirý úshin júıeli jumys júrgizilip kele jatqanyn aıtty. Sondaı-aq otandyq medıany jańǵyrtý jáne básekege qabiletti qazaqstandyq BAQ-ty damytý úshin de tıisti jaǵdaılar jasalyp jatqanyna nazar aýdardy. Ol úshin «Aqparatqa qol jetkizý týraly» jáne «BAQ týraly» zańdar qabyldandy. Odan bólek, Qazaqstan BAQ salasyndaǵy halyqaralyq qujattar bazasyn ratıfıkatsııalady. Onyń ishinde Azamattyq jáne saıası quqyqtar týraly halyqaralyq pakt, Adam quqyqtarynyń jalpyǵa birdeı deklaratsııasy jáne EQYU men ıÝNESKO-nyń basqa da qujattary bar.
Suhbat barysynda «Halyq únine qulaq asatyn memleket» tujyrymdamasy aıasynda Qazaqstan Prezıdenti Qasym-Jomart Toqaevtyń bastamasymen qolǵa alynǵan júıeli reformalar jaıy da sóz boldy. Máýlen Áshimbaev ol reformalardy iske asyrýda Parlament mańyzdy ról atqaratynyn atap ótti.
«Prezıdentimizdiń elimizdi jańǵyrtý baǵdary aıasynda saıası reformalardyń úsh toptamasy usynyldy. Qazirgi tańda memlekettik organdardyń ashyqtyǵy men qoǵam aldyndaǵy eseptiligin arttyrýǵa arnalǵan «Qoǵamdyq baqylaý týraly» zań jobasy ázirlenip jatyr. Adam quqyqtaryn qorǵaý salasyn kúsheıtýge basa mán berilýde. Sondaı-aq azaptaýlarǵa qarsy jáne adam saýdasymen kúres, azamattardy, ásirese balalardy kıberbýllıngten qorǵaý jónindegi zańnamalardy jetildirý boıynsha jumys júrgizilip keledi», – dedi Máýlen Áshimbaev.
Senat spıkeriniń aıtýynsha, álem boıynsha tsıfrlyq medıa-ortany damytý azamattardyń sóz bostandyǵyn qamtamasyz etýdiń sheshýshi faktoryna aınaldy. Zamanaýı medıa tehnologııalar jáne olardyń damýy bir jaǵynan jańa múmkindikterge jol ashsa, ekinshi jaǵynan túrli syn-qaterlerdi de týdyrǵany sózsiz. Máýlen Áshimbaev bul máselelerdi tıimdi sheshý úshin halyqaralyq qoǵamdastyq belsendilik tanytýǵa tıis ekenin tilge tıek etti.
Kezdesý sońynda Senat tóraǵasy EQYU ókili Tereza Rıbeıronyń elimizge sapary Qazaqstan men Uıymnyń yntymaqtastyǵyn odan ári arttyryp, ekijaqty baılanysqa tyń serpin beretinine senim bildirdi.