Máýlen Áshimbaev Dúnıejúzilik Islam Lıgasynyń ókilimen kezdesti

NUR-SULTAN. QazAqparat – QR Respýblıkasy Parlamenti Senatynyń tóraǵasy – Álemdik jáne dástúrli dinder lıderleri Sezi Hatshylyǵynyń basshysy Máýlen Áshimbaev Dúnıejúzilik Islam Lıgasy Bas hatshysynyń keńesshisi Abdýl Ázız Ben Ahmad Sarhanmen kezdesti, dep habarlaıdy QazAqparat.

Óz sózinde Senat spıkeri meımanǵa Sezd Hatshylyǵynyń HІH otyrysyna qatysqany úshin alǵys bildirip, Forýmnyń negizgi maqsattary ıslam áleminiń oń pikiri men qoldaýyna ıe bolǵanyn atap ótti.

«Ýaqyt ótken saıyn Sezdiń halyqaralyq arenadaǵy mańyzy artyp keledi. Aldaǵy ýaqytta Nur-Sultan qalasyndaǵy dinaralyq dıalog beıbitshilikti, kelisimdi jáne yntymaqtastyqty halyqaralyq deńgeıde qamtamasyz etýdiń mańyzdy faktory retinde óz rólin atqara beredi dep senemiz», – dedi Máýlen Áshimbaev.

Sonymen qatar suhbattasýshylar pandemııaǵa baılanysty qajylyq jasaý kezinde týyndaıtyn qıyndyqtardy talqylady. Senat tóraǵasy pandemııadan keıingi kezeńde jaǵdaı turaqtalyp, Qazaqstan azamattary ózderiniń dinı paryzdaryn óteýge qaıtadan múmkindik alaryna úmittenetinin jetkizdi.

Іs-shara sońynda M. Áshimbaev Dúnıejúzilik Islam Lıgasynyń Bas hatshysyna 2022 jylǵy qyrkúıek aıynda Qazaqstan astanasynda ótetin Álemdik jáne dástúrli dinder lıderleriniń VII Sezine qatysý úshin shaqyrý joldady.