Máýlen Áshimbaev: Bıyl qabyldanǵan ár tórtinshi zańǵa Parlament depýtattary bastamashy boldy
«Búgin Senattyń osy jyldaǵy qorytyndy otyrysyn ótkizdik. 2021 jyl elimiz úshin erekshe jyl boldy. Qasterli Táýelsizdgimizdiń 30 jyldyǵy atap óttik. Parlament Úkimetpen birlesip Prezıdent Joldaýy men tapsyrmalaryn iske asyrýdy zańnamalyq turǵydan qamtamasyz etýde. Sonyń nátıjesnide bıyl Parlament 104 zań qabyldady. Qabyldanǵan zańdar elimizdiń saıası, áleýmettik-ekonomıkalyq ornyqty damýyn kózdeıdi», - degen Máýlen Áshimbaev Prezıdent tapsyrmasy boıynsha qabyldanǵan birqatar mańyzdy zańdarǵa toqtaldy.
Olardyń qatarynda jer qatynastary máselelerin, memlekettik jáne jergilikti basqarý júıesin retteýge, ólim jazasynan bas tartýǵa, quqyq qorǵaý organdaryn reformalaýǵa, eldegi bıznes ortany jaqsartýǵa, otandyq ónerkásipti jetildirýge arnalǵan zańdar jáne taǵy basqa normalar bar.
Senat tóraǵasy depýtattardyń zań shyǵarýǵa bastamashy bolýda jumys istegenin atady.
«Jyl ótken saıyn bul jumystyń sany da, sapasy da artyp keledi. Bıyl qabyldanǵan ár tórtinshi zańǵa Parlament depýtattary bastamashy boldy. Olardyń qatarynda elimizdiń sot júıesin odan ári reformalaýǵa, azamattyq protsesti jeńildetýge, tatýlastyrý rásimderin qoldaný salasyn keńeıtýge, jeke tulǵanyń jalǵyz baspanasyn kepil retinde qabyldaýǵa shekteý qoıýǵa jáne basqa da máselelerdi retteýge baǵyttalǵan mańyzdy zańdar bar. Prezıdenttiń tapsyrmasy boıynsha depýtattardyń bastamashy bolýymen ázirlengen zańdardyń qatarynda «Adam quqyqtary jónindegi ýákil» týraly zań da bar», – dedi Máýlen Áshimbaev.
Sondaı-aq, ol 2021 jyly senatorlar zań shyǵarýmen qatar basqa da baǵyttar boıynsha tabysty jumys istegenin aıtyp, óńirlerdegi máselelerdi sheshý, kásipkerlikti damytý jáne ulttyq qundylyqtardy dáripteý baǵyttary Senat ókilderiniń únemi nazarynda bolǵanyn eske saldy.
«Bıyl biz zań shyǵarýmen qatar parlamenttik qyzmetimizdiń ózge de baǵyttary boıynsha mazmundy ári nátıjeli jumys istedik. Senatorlar mańyzdy taqyryptar boıynsha memlekettik organdarǵa 100-ge jýyq depýtattyq saýal joldady. Senat qabyrǵasynda qoǵamdy alańdatqan ózekti máselelerge arnalǵan 80-nen astam is-shara ótkizildi», – dep túıindedi Senat tóraǵasy.