Máýlen Áshimbaev: Beıbarys sekildi tulǵanyń ómiri tarıh ǵylymy úshin óte mańyzdy
Konferentsııa barysynda Senat spıkeri túrkiden shyqqan dańqty bıleýshiniń tulǵasy men ómirin dáripteıtin aýqymdy jıyndy joǵary deńgeıde ótkizgeni úshin Mysyr basshylyǵy men halqyna Qazaqstan Prezıdenti Qasym-Jomart Toqaevtyń alǵysyn jáne jyly lebizin jetkizdi. Sondaı-aq Máýlen Áshimbaev i Qazaqstan men Mysyrdyń ortaq tarıhı-mádenı murasyn ári qaraı zerttep, dáripteý jolynda osyndaı ǵylymı konferentsııalar ótkizýdiń mańyzy zor ekenin aıtty.
«Ál-Azhar – álemdegi eń kóne jáne búginge deıin úzdiksiz qyzmet etip kele jatqan biregeı joǵary oqý orny. Bul – musylman áleminiń ǵana emes, jahandyq oıdy ólsheýsiz baıytqan, adamzat kóshin ilgeriletken bilim shańyraǵy. Óz dáýirinde Beıbarys sultan ýnıversıtetti kúrdeli jóndeýden ótkizip, oǵan ekinshi tynys bergeni tarıhtan málim. Sondyqtan Beıbarystyń 800 jyldyq mereıtoıyna arnalǵan konferentsııanyń Ál-Azhar qabyrǵasynda ótýin óte oryndy dep qabyldaımyz», – dedi Máýlen Áshimbaev.
Sondaı-aq ol qazaq dalasynda týyp, Mysyrdyń sultany bolǵan Beıbarys túrki jáne arab jurtyna ortaq asa kórnekti tarıhı tulǵa ekenin aıtty. Soǵan baılanysty áıgili qolbasshynyń ómir jolyn zertteý álemdik ǵylym úshin de ózekti ári mańyzy joǵary is ekeni sózsiz.
«Bizdiń tarıhı-mádenı baılanysymyzdyń tamyry tereńnen bastaý alady. Beıbarys sultannyń tulǵasy sonyń jarqyn dáleli. Ol qazaq dalasynda týyp-ósip, arab jerinde aıtýly basshyǵa aınaldy. Beıbarys sekildi tulǵanyń ómiri tarıh ǵylymy úshin óte mańyzdy ekeni sózsiz. Sondyqtan onyń zertteý jáne dáripteý jumystaryn odan ári jalǵastyrýdyń mańyzy zor dep esepteımiz», – degen Máýlen Áshimbaev bul baǵytta Qazaqstan birlesip jumys isteýge múddeli ekenin atap ótti.
Palata Spıkeri ortaq tarıh eki eldiń baılanysyn arttyra túsetinin aıtyp, aldaǵy ýaqytta Qazaqstan men Mysyr arasyndaǵy mádenıe-gýmanıtarlyq qarym-qatynas nyǵaıa beretinine senim bildirdi.
Sonymen qatar Máýlen Áshimbaev Qazaqstannyń Mysyrdaǵy mádenıet kúnderine arnalǵan is-sharaǵa qatysty. Atap aıtqanda, Kaır qalasyndaǵy «Cairo Opera House» opera teatrynda qazaqstandyq óner juldyzdarynyń qatysýymen gala-kontsert ótti. Onda «Astana Opera» teatrynyń solısteri, Qurmanǵazy atyndaǵy qazaq ulttyq halyq aspaptar orkestriniń ártisteri, «Saltanat» memlekettik bı ansambliniń bıshileri jáne taǵy basqa ónerpazdar óner kórsetti. Kesh barysynda qazaq kompozıtorlarynyń belgili týyndylary oryndaldy.
Odan bólek, elimizdiń mádenıet kúnderi aıasynda qazaq halqynyń dástúri men ónerin dáripteıtin qolóner sheberleriniń kórmesi uıymdastyryldy.