Máýlen Áshimbaev Bashqurtstan basshysymen kezdesti

NUR-SULTAN. QazAqparat - Senat Tóraǵasy Máýlen Áshimbaev Reseı Federatsııasy Bashqurtstan Respýblıkasynyń basshysy Radıı Habırovpen kezdesti, dep habarlaıdy QazAqparat joǵary palatanyń baspasóz qyzmetine silteme jasap.

Óz sózinde Senat spıkeri Qazaqstan úshin Reseı Federatsııasy odaqtas jáne strategııalyq seriktes memleket ekenin atap ótti. Eki el arasynda ózara túsinistik pen senimge negizdelgen qarym-qatynas ornaǵanyn tilge tıek etken Máýlen Áshimbaev osyǵan baılanysty Bashqurtstan Respýblıkasymen saýda-ekonomıkalyq, mádenı-gýmanıtarlyq jáne saıası baǵyttarda ekijaqty yntymaqtastyqty odan ári nyǵaıta túsýdiń mańyzdy ekenine nazar aýdardy.

«Bizdiń elderimiz arasynda depýtattyq korpýs deńgeıinde yntymaqtastyqtyń barlyq baǵyty boıynsha turaqty dıalog ornady. Reseı Federaldy Jınalysy Federatsııa Keńesiniń tóraıymy Valentına Matvıenkonyń Qazaqstanǵa resmı sapary kezinde eki eldiń parlamentaralyq ózara is-qımylyn ári qaraı belsendi túrde damytý jóninde kelisken edik. Federaldy Jınalysy Federatsııa Keńesine Bashqurtstannyń atynan saılanǵan depýtattary bizdiń birlesken komıssııanyń jumysyna nemese Parlamentterimizdiń eki palatasy aıasyndaǵy basqa da is-sharalarǵa belsendi qatysa alady», – dedi Máýlen Áshimbaev.

Kezdesý sońynda Senat Tóraǵasy dostyqqa negizdelgen qazaq-bashqurt qarym-qatynasy eki halyqtyń ortaq tarıhı jetistigi jáne ortaq múddelerdi qamtıtyn baǵyttardaǵy tabysty seriktestiktiń berik irgetasy ekenin aıtty.

(Senattyń Baspasóz qyzmeti,