Máýlen Áshimbaev: Azamattyq alıanstyń zań jobalaryn ázirleýge qatysqany mańyzdy

NUR-SULTAN. QazAqparat – Ulttyq qoǵamdyq senim keńesiniń sońǵy otyrysynda kóterilgen usynystarǵa qatysty zań jobalaryn ázirleýde Azamattyq alıanstyń belsendilik tanytqany mańyzdy. Azamattyq alıans ókilderimen kezdesý kezinde Prezıdent Ákimshiligi basshysynyń birinshi orynbasary Máýlen Áshimbaev osylaı dedi, dep habarlaıdy QazAqparat tilshisi.

«Ózara qarym-qatynasty bes baǵytta nyǵaıtsaq dep otyrmyz. Bul jerde Azamattyq alıans Prezıdent Ákimshiligimen, memlekettik organdarmen, Aqparat jáne qoǵamdyq damý mınıstrligimen, ekinshi jaǵynan úkimettik emes sektormen jumysty kúsheıtse deımiz. Birinshiden, Memleket basshysynyń tapsyrmasy boıynsha qoǵam suranysyna berilgen jaýap retinde keıbir qylmystarǵa qatysty jaza kúsheıtilýde. Qoǵamdaǵy máselelerdi túzeýge baǵyttalǵan zańdar qabyldanýda. Alaıda ary qaraı jumysty jalǵastyrý kerek. Ulttyq qoǵamdyq senim keńesiniń sońǵy otyrysynda kóterilgen usynystarǵa qatysty zańdardy ázirleýde Azamattyq alıans belsendilik tanytsa deımiz», - dedi ol.

Máýlen Áshimbaevtyń aıtýyna qaraǵanda, memlekettik organdardyń aldynda turǵan mańyzdy mindetterdiń biri – zańǵa engiziletin ózgeristerdi halyqqa barynsha uǵynyqty túrde jetkizý.

«Qoǵamdyq dıalog ornatyp, bılik pen qoǵamnyń arasynda júıeli kommýnıkatsııany ornatqan abzal», - dedi ol.

Eske sala ketsek, elordada Qazaqstannyń Azamattyq alıansynyń konferentsııasy ótip jatyr.