Máýlen Áshimbaev: Astananyń mereıtoıy – tutas ultymyzdyń mereıi
«Qurmetti dostar! Barshańyzdy Astananyń 25 jyldyq mereıtoıymen shyn júrekten quttyqtaımyn!
Elordamyz osy jyldardyń ishinde qarqyndy damyp, óziniń mártebesine saı eńseli ortalyqqa aınaldy. Ultymyzdy uıystyryp, birligimizdi bekemdeýge zor yqpalyn tıgizdi.
Astananyń Arqa tórine kóshýi elimiz úshin óte qıyn kezeńderde iske asqany belgili. Prezıdentimiz Qasym-Jomart Kemeluly Toqaev keshe ǵana ótken Astananyń 25 jyldyq mereıtoıyna arnalǵan baýyrlas qalalar forýmynda «bul – halqymyzdyń bolashaq taǵdyryn aıqyndaǵan asa mańyzdy jáne der kezinde qabyldanǵan tarıhı sheshim bolǵanyn» aıryqsha atap ótti.
Shyn máninde, jańa astana ózi ǵana órkendep qoımaı, tutas eldiń ilgeri jyljýyna tyń serpin berdi. Astanamyz shırek ǵasyrdyń ishinde jan-jaqty damydy. Osylaısha ol ákimshilik ortalyq qana emes, mádenı-rýhanı salmaǵy basym irgeli shaharǵa aınaldy.
Sondyqtan, Astananyń mereıtoıy – tutas ultymyzdyń mereıi dep senimdi túrde aıta alamyz. Barshańyzdy osy merekemen quttyqtaı otyryp, elimizge amandyq, jerimizge tynyshtyq jáne ár otbasyna yrys pen yntymaq tileımin!
Eldigimiz máńgi, erteńimiz baıandy bolsyn! Qalamyz ósip-órkendeı bersin! Astana kúni qutty bolsyn!» - delingen quttyqtaý mátininde.
Aıta ketsek, 1998 jyly 6 mamyrda ataýy resmı túrde Astana bolyp ózgergen elordamyzǵa bıyl 25 jyl toldy. Iá, bir kezdegi tyń ıgerýshiler qalasynan táýelsizdik nyshanyna aınalǵan bas qalanyń osydan 25 jyl buryn tusaýy kesilip, halyqaralyq tanystyrylymy ótken. Al, Astananyń bas jospary 25 jylda neshe ret ózgergenin bilesiz be?Eske salsaq, búgin elordada birqatar merekelik shara ótedi.