Máýlen Áshimbaev Arystaǵy apattan zardap shekken turǵyndarmen kezdesti
Máýlen Áshimbaev sapar barysynda qaýipsiz jerge kóshirilgen turǵyndarmen kezdesip, apatqa baılanysty qurylǵan oblystyq jedel shtabtyń jumysymen tanysty. Sondaı-aq gýmanıtarlyq kómek boıynsha ózge óńirlerden kelgen zattardy qarsy alý jumystaryna qatysyp, zardap shekken ata-analarmen jáne balalarmen jumys istep jatqan psıholog mamandarmen júzdesti.
Aldymen Máýlen Áshimbaev oblystyń Ordabasy aýdany Tórearyq aýylyndaǵy Táýke han mektebine at basyn burdy. Bul jerde tótenshe jaǵdaıdan zardap shekken Arys turǵyndarynyń bir toby ýaqytsha ornalastyrylǵan. Olarmen kezdesken partııa Tóraǵasynyń Birinshi orynbasary apattyń aıtyp kelmeıtinin nazarǵa alyp, jaǵdaıdyń baqylaýda ekenin jáne qalany qaıta qalpyna keltirý jumystary júıeli túrde júrgiziletinin tilge tıek etti.
Sondaı-aq «Nur Otan» partııasy Tóraǵasynyń Birinshi orynbasary tótenshe jaǵdaıdyń Qazaqstan halqy úshin úlken synaq bolǵanyn aıtyp, bul synnan da súrinbeı ótetinimizge senetinin jetkizdi.
- Bul tótenshe jaǵdaı qazaqstandyqtardy odan ári biriktirip, uıystyra túskenin kórip otyrmyz. Osy jerde óz erkimen kelip, qoldaý kórsetip júrgen belsendi azamattar da óte kóp. Bul bizdiń bekem birligimizdiń jarqyn kórinisi. Bizdiń kúshimiz - birlikte. Sondyqtan bul synnan da moıymaı, eńsemizdi tik ustap shyǵatynymyzǵa kámil senemin, - dedi Máýlen Áshimbaev.
Sonymen qatar ol Ordabasy aýdanynyń Aqjol aýylynda ornalasqan jedel shtabqa arnaıy kelip, atqarylyp jatqan jumys barysymen tanysty. Bul jerde apattyń zardaptaryn joıý jumystaryn úılestirý isi qolǵa alynǵan.
Qazirgi tańda elimizdiń barlyq óńirinen Arysqa qaraı gýmanıtarlyq kómekter aǵylyp kelip jatqany belgili. Bul halqymyzdyń birligi men birtutastyǵyn kórsetedi. Osy iste «Nur Otan» partııasy da belsendi áreket etýde.
Oqıǵa bolǵan kúni partııanyń barlyq oblystyq fılıalynda gýmanıtarlyq kómek qabyldaý oryndary ashylyp, olar táýlik boıy jumys istep tur. Alǵashqy kúnniń ózinde partııanyń muryndyq bolýymen Arystaǵy aǵaıynǵa qoldaý retinde Qaraǵandy oblysynan 10 tonna gýmanıtarlyq kómek keldi. Budan basqa, Qyzylorda, Aqtóbe, Qostanaı, Soltústik Qazaqstan, Batys Qazaqstan, Mańǵystaý, Atyraý, Jambyl jáne Pavlodar oblystary da kıim-keshek, azyq-túlik, dári-dármek, qurylys materıaldary tıelgen júk kólikterin jóneltti.
Partııa tarapynan uıymdastyrylǵan gýmanıtarlyq kómektiń jalpy kólemi 341 tonnany quraıdy. Osy aptanyń sońyna deıin qalǵan aımaqtardan da avtokerýender shyǵady. Sondaı kómektiń bir tobyn qarsy alǵan Máýlen Áshimbaev «Nur Otan» partııasynyń bul baǵyttaǵy jumystary ári qaraı da jalǵasatynyn aıtty.
- Qazirgi tańda partııanyń bastamasymen elimizdiń 9 oblysynan gýmanıtarlyq kómekter kelip jetti. Aldaǵy ýaqytta bul jumystar ári qaraı da jalǵasady. Endi biz qurylys materıaldaryn jáne basqa da qalany qalpyna keltirý jumystaryna qajetti zattardy jiberý máselesin qarastyramyz, - degen Máýlen Áshimbaev zardap shekkenderge kómek retinde aýdarylǵan qarajattyń ashyq ári ádil júrgiziletinin aıtty.
Sondaı-aq ol jaǵdaıdyń turaqty jáne Memleket basshysynyń baqylaýynda ekenin de tilge tıek etti.
- Gýmanıtarlyq kómekten bólek, partııa tarapynan zardap shekken ata-analar men balalarǵa psıhologııalyq qoldaý kórsetilip jatyr. Jasotandyqtardyń belsendiligin de erekshe atap ótken jón. Memleket basshysy Qasym-Jomart Kemeluly Toqaevtyń ózi arnaıy kelip, jaǵdaımen tanysyp shyqty. Qazir jaǵdaı tolyǵymen baqylaýda. Qalany qalpyna keltirý jumystaryna bizdiń partııa da tikeleı qatysyp, jumystyń júıeli túrde júrgizilýin baqylaýda ustaıdy, - dedi ol.
Budan basqa partııa qarjylaı da qoldaý kórsetýde. Atap aıtqanda, Ortalyq apparattan bastap barlyq, ıaǵnı 17 - aımaqtyq, 230 aýmaqtyq fılıaldyń qyzmetkerleri bir kúndik eńbekaqylaryn zardap shekkenderge kómek retinde aýdardy.
«Nur Otan» partııasynyń músheleri, belsendi kásipkerler de bul isten tys qalmaı kómek qoldaryn sozýda. Sonyń ishinde máslıhattardaǵy partııa fraktsııalarynyń músheleri, partııa aktıviniń ókideri, partııa Saıası keńesiniń músheleri bar. Sondaı-aq bastaýysh partııa uıymdary da belsendilik tanytyp jatyr. Máselen, «Aqtóbemunaıgaz SNPS» bastaýysh partııa uıymy 50 mıllıon teńge kóleminde qarajat aýdardy. Al Almaty oblystyq máslıhatynyń depýtaty, partııa Saıası keńesiniń múshesi, «BTK GROOP» JShS dırektory T.Botabekov óz qarajatyna qurylys materıaldary tıelgen eki júk kóligin jiberdi.
Sapar sońynda Máýlen Áshimbaev Shymkent qalasyndaǵy M.Áýezov atyndaǵy Ońtústik Qazaqstan Memlekettik ýnıversıtetiniń №5 jataqhanasyna kelip, osynda ornalasqan balalarmen jumys istep jatqan psıholog mamandarmen kezdesti.
Aıta keteıik, qazirgi tańda partııa janyndaǵy Balalar quqyǵyn qorǵaý jónindegi respýblıkalyq keńestiń mamandary apat bolǵan aımaqqa kelip, ata-analar jáne balalarmen jumys isteýde. Psıhologııalyq kómekten bólek, olar Keńestiń mobıldi shtabyn quryp, aımaqtardan kelgen gýmanıtarlyq kómekti jınap, taratý jumystaryn úılestirýde. Keńes jumystarynyń aıasynda «Nıet» qoǵamdyq qory 2400 balany kıim-keshekpen qamtamasyz etse, «Qasıetti jol» qoǵamdyq qory erekshe kútimdi talap etetin balalary bar otbasylardy ýaqytsha turǵyn jaılarǵa ornalastyrdy.