Máýlen Áshimbaev: Ár shańyraq shattyq pen qýanyshqa kenelsin

ASTANA. QazAqparat – Senat tóraǵasy Máýlen Áshimbaev Qazaqstan halqyn Ramazan aıynyń bastalýymen quttyqtady, dep habarlaıdy QazAqparat.

«Elimizdegi barsha musylman qaýymdy qasıetti Ramazan aıynyń bastalýymen shyn júrekten quttyqtaımyn!

Bul aıda sabyr men tózim, keshirim men meıirim, bereke men birlik saltanat qurady. Mol saýaptan úmit etken árbir musylman otyz kún orazada aýyz bekitip qana qoımaı, muqtaj jandarǵa qoldaý kórsetip, qamqorlyq tanytýǵa asyǵady. Munyń bári – ultty uıystyryp, jurtty jumyldyratyn izgi amaldar.

Bıyl Ramazan jyl basy – Naýryz meıramymen tuspa-tus kelip otyr. Rýhanı tazarý aıy men tirshilik ataýlyǵa nár beretin jańarý merekesiniń qatar kelýin jaqsylyqtyń nyshany dep qabyldaımyz. Bul da ıgi isterdiń eselene túsýine óz áserin tıgizeri sózsiz», - dep jazdy Senat spıkeri áleýmettik jelidegi paraqshasynda.

M.Áshimbaev qazaqstandyqtardy qasıetti aıdyń bastalýymen quttyqtaı otyryp, elimizge amandyq, jerimizge tynyshtyq tiledi.