Máýlen Áshimbaev áleýmettik kásipkerlikti qoldaıtyn zańnyń basymdyqtary týraly aıtty

NUR-SULTAN. QazAqparat - Senat tóraǵasy Máýlen Áshimbaev Almaty oblysyna jumys sapary barysynda oblystyń jáne Almaty qalasynyń áleýmettik kásipkerlerimen kezdesti. Kezdesýde áleýmettik kásipkerlikti damytýǵa arnalǵan zańnyń basymdyqtary týraly sóz boldy, dep habarlaıdy QazAqparat tilshisi.

Senat baspasóz qyzmetiniń málimetinshe, Máýlen Áshimbaev senatorlardyń bul salaǵa basa mán berýi tegin emes ekenin aıtyp, qazirgi tańda áleýmettik kásipkerlik ekonomıkanyń ósýi men qoǵamnyń damýynda mańyzdy ról atqaratynyna nazar aýdardy.

«Áleýmettik kásipkerlik - jańa baǵyttardyń biri. Onyń bolashaǵy zor. Bul sala tabys tabýmen qatar, azamattardyń ózekti áleýmettik máselelerin sheshýge múmkindik beredi. Sondyqtan Prezıdentimiz Qasym-Jomart Kemeluly Toqaev kásipkerliktiń bul túrine basa mán berip keledi», – dedi Senat spıkeri.

Sondaı-aq, ol áleýmettik kásipkerlikti damytýdy kózdeıtin zań Memleket basshysynyń tapsyrmasy boıynsha ázirlengenin, oǵan senatorlar bastamashyl bolǵanyn jetkizdi.

«Bul zańda alǵash ret áleýmettik kásipkerlikke zańnamalyq turǵydan túsinik berilgen. Osy zań arqyly áleýmettik kásipkerlerdi qoldaýǵa arnalǵan naqty sharalar da anyqtaldy. Atap aıtqanda, salyqtyq jeńildikter men nesıeniń ústeme aqysyn sýbsıdııalaý jáne jaldaý qunyn tóleý sııaqty qarjylaı qoldaýlar qarastyrylǵan. Memleket menshigindegi ǵımarattardy jeńildikpen jalǵa berý múmkindigi de nazarǵa alyndy. Odan bólek, memleket tarapynan áleýmettik mańyzy bar jobalardy iske asyrý úshin granttar bólinedi», – dedi Senat tóraǵasy.

Máýlen Áshimbaev elimizde áleýmettik kásipkerlikti júıeli túrde qoldaý úshin asa mańyzdy qadam jasalǵanyn aıtty.

Ol óz sózinde aldaǵy ýaqytta senatorlar bul salany odan ári qoldaýǵa arnalǵan jańa tetikterdi usynýǵa jáne olardy talqylaýǵa daıyn ekenin atap ótti.