Máýlen Áshimbaev aqparat zamanynda jastarǵa qandaı qasıetter kerektigin aıtty
Onda jas kóshbasshylar jańa jobalardy talqylap, tyń ıdeıalarymen bólisip, bilimderin jetildirýde. «Nur Otan» partııasy Tóraǵasynyń Birinshi orynbasary Máýlen Áshimbaev jastar forýmynyń úshinshi maýsym qatysýshylarymen arnaıy kezdesti. Ol óz sózinde partııa jumysyndaǵy ózgerister men ondaǵy jastardyń róli týraly aıtyp berdi.
Respýblıkalyq jastar bilim berý lageri úsh aýysymmen ótýde. Osyǵan deıin oǵan elimizdiń ár aımaǵynan kelgen 300-ge jýyq jas azamat qatysyp, bilimderin jetildirgen. Olarmen kezdesip, ómirlik tájirıbelerimen bólisken spıkerlerdiń qatarynda memleket jáne qoǵam qaıratkerleri, belgili kásipkerler, ǵalymdar, sportshylar jáne blogerler bar.
Máýlen Áshimbaev úshinshi maýsymnyń ashylýyna qatysty. Bul joly lagerge kelýshiler bıznes-bastamalar taqyrybyn talqylady. «Nur Otan» partııasy Tóraǵasynyń Birinshi orynbasary elimizdiń jarqyn bolashaǵy jastardyń qolynda ekenin aıtyp, olarǵa aldaǵy ómirlerine sáttilik tiledi. Sondaı-aq, ol qazirgi álemdik geosaıası ahýalǵa nazar aýdaryp, osy joldaǵy jastardyń róline toqtaldy.
- Qazirgi tańda álemdik geosaıası jaǵdaı óte kúrdeli. Kún saıyn túrli úrdister men jańa ekonomıkalyq qundylyqtar paıda bolýda. Osyndaı kezde ultty saqtap, odan ári damý úshin ulttyq múddeni kúsheıtip, ekonomıkany nyǵaıtyp, jańa tehnologııalardy keńinen qoldanýymyz kerek. Osy turǵydan kelgende Elbasynyń saıası jáne rýhanı jańǵyrý reformalaryn júzege asyrýdy belsendi jalǵastyrýymyz qajet. Sebebi, Memleket basshysy jarııalaǵan júıeli jańǵyrý baǵdarlamalarynyń negizgi maqsaty - ulttyq qundylyqtarymyzdy dáriptep, álemdik tájirıbelerden úırene otyryp eldigimizdi nyǵaıtý. Sondyqtan bul jumystarǵa memlekettik organdardan bólek, qoǵamdyq birlestikter, saıası partııalar, úkimettik emes uıymdar jáne jastar belsene qatysýy kerek, - dedi Máýlen Áshimbaev.
Partııa Tóraǵasynyń Birinshi orynbasary bul baǵytta «Nur Otannyń» qolǵa alǵan jumystaryna kóńil bólip, jastarǵa jańa partııalyq jobalar jaıynda jan-jaqty aıtyp berdi.
- Bul jumystarǵa «Nur Otan» partııasy da qatysyp, qarqyndy jumys isteýde. Atap aıtqanda, partııa jańǵyrý úrdisterin dáriptep, jańa jobalardy júzege asyrý arqyly elimizdiń strategııalyq kúshi bolyp qalyptasýdy kózdep otyr. Osy baǵytta biz bıýrokratııalyq júıeden arylyp, jalpylama jumystardan naqty, nátıjeli jumystarǵa kóshtik. Sonyń nátıjesinde 20-dan astam jańa partııalyq jobany qolǵa alyp, tıisti jumystardy bastap kettik, - dedi Máýlen Áshimbaev.
Óz sózinde spıker partııanyń «Tsıfrly Qazaqstan», «Rýhanı jańǵyrý» baǵdarlamalaryn júzege asyrýǵa úles qosýǵa, halyqtyń tsıfrlyq saýattylyǵyn arttyrýǵa jáne kásipkerlikti qoldaýǵa baǵyttalǵan birqatar naqty jobalardy qolǵa alǵanyna erekshe toqtaldy. Atap aıtqanda, partııa aldaǵy úsh jylda tegin 1000 ІT-synyp ashýdy josparlap otyr. Onda jylyna 150 myń bala baǵdarlamalaý, robot tehnıkalary jáne 3D modeldeý negizderin meńgeretin bolady. Al bolashaǵyn aqparattyq tehnologııa salasymen baılanystyrǵysy keletin azamattar úshin «Nur Otan» 20 ІT-ortalyq ashyp, bilikti ІT-mamandar daıarlaý isin bastap ketti. Atalǵan jobanyń túlekterine tek Qazaqstannan ǵana emes, álemdik ІT-naryǵyndaǵy tapsyrystardy oryndaý arqyly sheteldik kompanııalardan da jumys tabýǵa múmkindik bar. Qazirdiń ózinde elimiz boıynsha 100-den astam ІT-synyp pen 15 ІT-ortalyq ashyldy. Máýlen Áshimbaev bul jumystar «Nur Otan» partııasynyń «Tsıfrly Qazaqstan» baǵdarlamasynyń júzege asyrylýyna qosqan naqty úlesi ekenin atap ótti.
Aýyl balalaryna aǵylshyn tilin úıretý úshin partııa «English for Jastar» jobasyn júzege asyrýda. Sonyń aıasynda aldaǵy ýaqytta sheteldik azamattardy, «Bolashaq» baǵdarlamasynyń túlekterin jáne aǵylshyn tilin erkin meńgergen jasotandyqtardy, barlyǵy 500-ge jýyq jas azamatty elimizdiń ár óńirindegi aýyl-aımaqqa, sonyń ishinde shalǵaıdaǵy eldi mekenderge jiberý josparlanyp otyr.
Budan basqa Qazaqstannyń ár túkpirinde jastar ınfraqurylymyn damytýǵa baǵyttalǵan jańa partııalyq jobalar da bar. Solardyń qatarynda otandyq kitaphanalardyń jumysyn jańǵyrtyp, zamanaýı bilim ortalyqtary retinde qaıta qurý bastamasyn erekshe atap ótken jón. Osy máselege nazar aýdarǵan Máýlen Áshimbaev elimizdegi kitaphanalardyń basym bóliginde materıaldyq-tehnıkalyq baza men qyzmet kórsetý sapasy eskirgenine kóńil bóldi. Sondyqtan jastardyń kitap oqýǵa degen yntasyn oıatý úshin partııa dástúrli kitaphanalar bazasynda kovorkıng-ortalyqtar ashyp, qyzyqty semınarlar, trenıngter, dárister ótkizý isin qolǵa aldy. Osylaısha nurotandyqtar kitaphanalardyń tek kitap oqıtyn oryn ǵana emes naǵyz bilim ortalyǵyna aınaldyrýdy kózdeıdi.
Sonymen qatar, «Nur Otan» partııasy «Mektep ashanalaryn jańǵyrtý» jobasy arqyly bilim berý mekemelerinde durys tamaqtaný júıesin engizýdi qolǵa alyp otyr. Mamandardyń deregine júginsek, búginde elimizde shamamen tórt mıllıon adam artyq salmaq qosqandar qatarynda eken. Bul máseleniń túp-tamyry durys tamaqtanbaýda jatqany sózsiz. Osyny eskergen nurotandyqtar halyqty fastfýd, ıaǵnı tez daıyndalatyn, maıly, tátti jáne basqa da densaýlyqqa keri áserin tıgizetin tamaqtardan bas tartyp, olardyń ornyn jemis-jıdek, kókónis sııaqty taǵam túrlerimen almastyrýǵa shaqyrýda. Bul bastamaǵa ata-analar men ustazdar da úlken qyzyǵýshylyq tanytyp, joba bilim oshaqtarynda keńinen júzege asyrylýda.
«Densaýlyq sabaǵy» jáne «Sport ınfraqurylymyn jańǵyrtý» jobalary arqyly partııa mektep oqýshylarynyń salamatty ómir saltyn ustanýlaryna da jaǵdaı jasaýdy qolǵa alyp otyr. Sonyń nátıjesinde «Nur Otan» bıznes qaýymdastyqpen birlesip mektepterde qazirgi zamanǵa saı sport alańdaryn ashyp, bastaýysh synyp oqýshylary úshin «densaýlyq saǵatyn» engizbek.
Sonymen qatar Máýlen Áshimbaev qazir aqparat zamany ekenin aıtyp, osyndaı kezeńde Elbasy anyqtap bergen mindetterdi júzege asyryp, maqsatqa qol jetkizý jolynda jastardyń boıynda qandaı qasıetter bolýy kerektigine toqtaldy.
- Birinshiden, ár adam ózin-ózi únemi jetildirip, damytyp, izdenýi tıis. Kásibı, zııatkerlik jáne bilim deńgeıin arttyrýǵa erekshe kóńil bólýleri kerek. Kitap oqýdy ıgi dástúrge aınaldyrýy qajet. Bul rette oqıtyn kitaptardy durys tańdaý kerektigin de eskergenimiz jón. Ekinshiden, sananyń ashyqtyǵyn qalyptastyrýymyz kerek. Elbasy da «Rýhanı jańǵyrý» baǵdarlamasynda osy máseleni kótergeni belgili. ıAǵnı jastar birjaqty bolmaı, kez kelgen máselege qatysty basqa da balama pikirlerdi eskerip, dúnıetanym aıasyn udaıy keńeıtip otyrýy tıis. Úshinshiden, jastar aldaryna naqty maqsattar qoıyp, durys armandaı bilýleri tıis. Óıtkeni jastarynyń armany asqaq, maqsaty aıqyn bolmasa, ondaı eldiń bolashaǵy bulyńǵyr. Sondyqtan, jastar aldaryna strategııalyq maqsattar qoıyp, soǵan jetý jolynda bar kúsh-jigerin jumsaýy kerek, - dedi «Nur Otan» partııasy Tóraǵasynyń Birinshi orynbasary.
Kezdesý sońynda jastar ózderin tolǵandyrǵan saýaldaryn joldap, aldaǵy ýaqytta túrli jobalardy partııamen birlesip júzege asyrý úshin tyń ıdeıalarymen bólisti. Máýlen Áshimbaev barlyq usynylǵan jobalardy qarastyratynyn aıtyp, jastardy jańa partııalyq jobalardy júzege asyrýǵa jáne aldaǵy ýaqytta elimizde keńinen engizý úshin jastar ıdeıalary men jobalarynyń tizimin jasaýǵa belsene qatysýǵa shaqyrdy.