Máýlen Áshimbaev: «Abaı-Toǵjan» qoıylymy Abaıtaný ilimine tyń serpin bergen týyndy
«Byltyr elimizde Abaıdyń 175 jyldyǵy keńinen atalyp ótti. Sonyń aıasynda aýqymdy jumys atqaryldy. Degenmen, uly oıshyldyń ósıetterin dáripteý jolynda bir jylmen shektelip qalýǵa bolmaıtyny túsinikti. Óıtkeni bizdiń ulttyq bolmysymyz ben dúnıetanymymyzdyń qalyptasýynda hakim Abaıdyń róli erekshe. Biz boıymyzdy da, oıymyzdy da Abaı sózderine qarap túzeımiz. Sondyqtan aqyn murasyn dáripteý, ásirese, ony óskeleń urpaqtyń sanasyna sińirý qashanda mańyzdy», - dep jazdy Senat Tóraǵasy Facebook paraqshasynda .
Osy oraıda ol elordamyzdaǵy Mýzykalyq jas kórermen teatrynyń ıgilikti isin erekshe atap ótedi.
«Taıaýda atalǵan óner ordasynda «Abaı-Toǵjan» qoıylymyn tamashalap, keremet rýhanı keshtiń kýási boldym. Buǵan deıin kóbine aqynnyń ulǵaıǵan shaǵyn kórip kelsek, bul joly biz jas Abaıdy kórdik. Onyń kemeńger bolyp qalyptasýynyń alǵashqy kezeńderine úńildik. Aqyn lırıkasynyń bastaýyna nazar aýdardyq. Sol sebepti, atalǵan spektakldi Abaıtaný ilimine tyń serpin bergen týyndy dep qabyldaımyn. Shyn máninde, oıshyldyń ómir joly – kúreske toly kúrdeli jol. Ony Abaı men Toǵjannyń mahabbatynan da ańǵarý qıyn emes. Sondaı kezeńder aqyn fılosofııasynyń qalyptasýyna úlken áserin tıgizgeni sózsiz. Qoıylymda sonyń bári erekshe tapqyrlyqpen sýrettelgen», - dedi Máýlen Áshimbaev.
Senat spıkeriniń atap ótýinshe, bul teatrdyń ashylǵanyna kóp ýaqyt bola qoıǵan joq. Soǵan qaramastan Abaı ómirin sahnalaý arqyly kórermenge aıtary mol óner ordasy retinde tanylyp otyr. Onyń repertýarynda Muqaǵalıdiń, Shámshiniń shyǵarmashylyǵyna arnalǵan qoıylymdar da bar.
«Osy rette teatrdyń akterler quramyna da toqtala ketken jón. Olardyń qatarynda Samal Eslıamova, Aıan Ótepbergen, Asylhan Tólepov sııaqty belgili daryn ıelerimen birge jas talanttar da bar. Ónersúıer qaýymǵa ǵajaıyp kóńil-kúı syılap júrgen teatr akterlerine jáne osy ujymnyń basshysy, kásibı rejısser, sheber uıymdastyrýshy Ashat Maıamerovke aıryqsha alǵysymyzdy bildiremiz. Teatr – klassıkalyq óner. Al, klassıka qashanda bıik turady. Sol sebepti, jas teatrdyń ǵumyry uzaq bolaryna senemiz jáne soǵan tilekshimiz. Alar asýlaryńyz kóp bolsyn. Іndetten tezirek qutylyp, zal kórermenge lyq tolatyn kún týsyn. Qazaq óneri jasaı bersin!», - dep izgi tilegin jetkizedi Senat Tóraǵasy.