Máýlen Áshimbaev: Abaı men Naýaı eńbekterin qatar aýdarýdyń sımvolıkalyq máni bar

NUR-SULTAN. QazAqparat - Uly Abaıdyń 175 jyldyǵy aıasynda aqynnyń ózbek tiline aýdarylǵan shyǵarmalary men shyǵystyń ǵulama shaıyry Álisher Naýaıdiń qazaq tilinde jaryq kórgen «Hamsa» atty kitaby kópshilikke tanystyryldy, dep habarlaıdy QazAqparat joǵary palatanyń baspasóz qyzmetine silteme jasap.

Kitaptardyń tusaýkeser rásimine Qazaqstan Respýblıkasy Parlamenti Senatynyń tóraǵasy Máýlen Áshimbaev, Ózbekstannyń Olıı Májilis Senatynyń tóraıymy Tanzıla Narbaeva, Halyqaralyq Túrki akademııasynyń prezıdenti Darhan Qydyráli, Túrkııa, Ózbekstan, Qyrǵyzstan elderiniń Qazaqstandaǵy elshileri, Májilis depýtattary jáne birqatar aqyn-jazýshy men zııaly qaýym ókilderi qatysty.

Máýlen Áshimbaev bul kúnniń qazaq jáne ózbek ádebıeti úshin, sondaı-aq, tutas túrki jurty úshin mańyzy zor ekenin aıtty.

«Abaı qazaqtyń ǵana aqyny emes. Ol – barsha adamzatqa ortaq ǵulama. Aqynnyń oı-tolǵamdary men ósıeti barsha túrki jurtyna arnalǵan desek te, artyq bola qoımas. Qazirgideı syn-qaterler zamanynda biz osyndaı ortaq qundylyqtarymyzdy keńinen dáripteýimiz kerek. Ásirese, jas býynǵa jan- jaqty nasıhattasaq, túrki dúnıesiniń birligin nyǵaıtýǵa qosylǵan úlken úles bolar edi», – dedi Senat tóraǵasy.

Sonymen qatar ol Abaı men Naýaı muralarynyń rýhanı sabaqtastyǵyna nazar aýdardy.

«Shyǵys shaıyrlarynyń dara tulǵasy, ejelgi túrki ádebıetiniń atasy Álisher Naýaıdiń eńbegin qazaq tiline aýdarýdy mańyzdy oqıǵa dep qabyldaımyz. Bul – qazaq ádebıetine qosylǵan qundy úles. Abaı Naýaıdi óziniń rýhanı ustazy sanap, onyń óleńderinen taǵylym alǵanyn bárimiz jaqsy bilemiz. Osy turǵydan kelgende, eki birdeı kemeńgerdiń eńbekterin

qatar aýdarýdyń sımvolıkalyq máni bar», – degen Máýlen Áshimbaev Naýaı poezııasynyń mańyzy men álemdik ádebıettegi orny týraly da sóz qozǵady.

Saltanatty rásim kezinde Ózbekstan Olıı Májilisi Senatynyń tóraıymy Tanzıla Narbaeva, Ózbekstannyń Qazaqstandaǵy Tótenshe jáne Ókiletti Elshisi Saıdıkram Nııazhodjaev, Májilis depýtaty Saýytbek Abdrahmanov jáne aqyn Nesipbek Aıtuly sóz sóılep, mundaı sharalar túrki áleminiń yntymaǵyn nyǵaıta túsetinin aıtty.

«Hamsa» – Álisher Naýaıdiń áıgili bes dastannan turatyn eńbegi. Qazaq tilinde jaryq kórgen kitapqa «Láıli-Májin» jáne «Eskendir qorǵany» atty eki dastan engen. Bul shyǵarmalardy kóne ózbek tilinen qazaqtyń belgili aqyny Nesipbek Aıtuly aýdardy. Shalqar shabytpen, asqan sheberlikpen tárjimalanǵan jaýhar týyndylar baýyrlas eki el arasyndaǵy ádebı jáne mádenı baılanystardyń altyn kópirine aınalary sózsiz.

Atalǵan ıgilikti iske Halyqaralyq Túrki Akademııasy uıytqy boldy. Osy rette Akademııanyń muryndyq bolýymen buǵan deıin de bul baǵytta birqatar mańyzdy bastama júzege asyrylǵanyn atap ótken jón.