Máýlen Áshimbaev: «7-20-25» baǵdarlamasy - jas otbasylar úshin úlken múmkindik

ORAL. QazAqparat  - Oralda búgin «7-20-25» memlekettik baǵdarlamasy aıasynda 90 páterlik turǵyn úı paıdalanýǵa berildi, dep habarlaıdy QazAqparat tilshisi.

BQO-ǵa jumys saparymen kelgen «Nur Otan» partııasy Tóraǵasynyń birinshi orynbasary Máýlen Áshimbaev oblys ákimi Altaı Kólginovpen birge atalmysh baǵdarlamanyń óńirdegi alǵashqy qatysýshylaryna páter kiltterin tabys etti.

Máýlen Áshimbaev «7-20-25» baǵdarlamasy qoǵamdaǵy eń ózekti máselelerdiń biri - baspana jaıyn tıimdi sheshýge baǵyttalǵan mańyzdy bastama, ásirese, jas otbasylar úshin úlken múmkindik ekendigin jetkizdi.

- Baspanany kez kelgen otbasy úshin bolashaqqa salynǵan ınvestıtsııa desek te, artyq emes. Osylaısha Elbasy barsha qazaqstandyqtardyń úıli bolýyna dańǵyl jol ashyp, ıpotekalyq nesıelerdiń qoljetimdiligin qamtamasyz etip otyr. Osy sapar nátıjesinde bes bastamanyń Batys Qazaqstan oblysynda tabysty júzege asyrylyp jatqanyna kýá boldyq. Aldaǵy ýaqytta da partııa bul jumystardy baqylaýdy jalǵastyra beredi, - dedi partııa Tóraǵasynyń birinshi orynbasary.

    Aıta keteıik, óńirde turǵyn úı qarqyndy salynýda. Bıylǵy jeti aıda 250 myń sharshy metrden astam baspana iske qosyldy. Jyl sońyna deıin taǵy 415,7 myń sharshy metr, sonyń ishinde bes áleýmettik bastamanyń birinshi baǵyty boıynsha 46 myń sharshy metr turǵyn boı kótermekshi.

«7-20-25» baǵdarlamasyn júzege asyrýǵa jaýapty ekinshi deńgeıli bank ókilderiniń sózine qaraǵanda, BQO boıynsha 55 ótinish kelip túsken. Oral qalasy boıynsha 19 myń adam turǵyn úı kezeginde tur.

Máýlen Áshimbaev jumys sapary barysynda M.Ótemisov atyndaǵy Batys Qazaqstan memlekettik ýnıversıtetinde ashylǵan ІT-ortalyqta boldy. Ortalyqtyń jumysy eki baǵytqa bólingen: ІT-sala mamandarynyń biliktilikterin arttyrý jáne jumyspen qamtý ortalyǵy arqyly jiberilgen azamattardyń tsıfrlyq saýattylyǵyn jetildirý. Osy ýaqytqa deıin jumyspen qamtý ortalyǵy arqyly kelgen 54 azamatqa sertıfıkattar tabystalǵan. 

Atalmysh oqý ornynda ashylǵan ІT-ortalyqta bıylǵy 1 tamyzdan bastap aımaq boıynsha 30 ınformatıka muǵalimi baǵdarlamalaý, robot tehnıkasy jáne 3D modeldeý negizderi jaıynda tereńdetilgen bilim alǵan. Bolashaqta bul mamandar Batys Qazaqstanda ashylǵan tegin ІT-synyptarda oqýshylarǵa bilim beretin bolady.

ІT-synyptardyń biri Oral qalasyndaǵy jastar jáne oqýshylar saraıynda ashyldy. Qazirdiń ózinde Batys Qazaqstan oblysynda 15 ІT-synyp ashylyp, onda 150 mektep oqýshysy ІT salasy boıynsha bilim alýda. Atalǵan synyptar Oral qalasymen birge oblystyń barlyq aýdandarynda, aýyldyq jerlerde de júıeli jumys istep tur. «Nur Otan» partııasy aldaǵy úsh jylda el boıynsha bir myńǵa jýyq tegin ІT-synyptar ashýdy josparlap otyr.

Máýlen Áshimbaev sondaı-aq Jastar jáne oqýshylar saraıyndaǵy kovorkıng ortalyqta jastar uıymdarynyń ókilderimen kezdesti. Búginde Batys Qazaqstan oblysynda 4 kovorkıng ortalyq ashylǵan. Olardyń úsheýi oblys aýdandarynda, bireýi Oral qalasynda. «Bastaý» kovorkıng ortalyǵy - frılans rejıminde jastardyń bıznes, shyǵarmashylyq, oqý baǵdarlamalary aıasyndaǵy kreatıvti jobalaryn (qyzyǵýshylyǵy boıynsha klýbtar, kórmeler, úıirmeler, sheberlik synyptar, trenıngter, English club t.b.) jaryqqa shyǵaryp, júzege asyrýǵa múmkindik beredi. 

-Qazirgi tańda jastardyń bilimdi, saýatty bolýy asa mańyzdy. Jastar básekelestik dáýirinde ómir súrip jatqandyqtan, óziniń jeke qabiletterin damytý úshin kóp eńbek etýi kerek, kóp kitaptar oqýy qajet. Ásirese, aǵylshyn tilindegi shyǵarmalardy. Al, ol úshin aǵylshyn tilin meńgerý kerek. Sonda álemniń eń úzdik shyǵarmalarymen erkin tanysa alasyzdar, - dedi kezdesý barysynda M.Áshimbaev.

Sapar barysynda «Onlaın ulttyq biryńǵaı geoaqparattyq qyzmet» shaǵyn jáne orta bıznesti qoldaýǵa baǵyttalǵan partııalyq joba aıasynda ázirlengen «SMART URALSK» avtomattandyrylǵan júıesi tanystyryldy. Bul portal arqyly kásipkerler bos jer telimderi týraly tolyq aqparat alýǵa qol jetkizedi jáne ol barlyq qoldanýshyǵa qoljetimdi bolmaq. Oral qalasy elimiz boıynsha aqyldy qala júıesin Astanadan keıin engizgen ekinshi qala boldy. Máselen, Oral qalasy ákimdiginiń ǵımaratynda bólimderdiń jeke jáne zańdy tulǵalarǵa qyzmet túrlerin kórsetýge arnalǵan «Ashyq ákimdik»  atty ınnovatsııalyq joba júzege asyrylýda.  Osynyń arqasynda qala ákimdiginiń ǵımaratynda ornalasqan jer qatynastary, sáýlet jáne qala qurylysy, aýyl sharýashylyǵy bólimderine qyzmet alýǵa kelgen turǵyndar túrli yńǵaısyzdyqtardan túgelimen arylǵan. Qazir barlyq qyzmetti «bir tereze» qaǵıdasy boıynsha alýǵa bolady.

Máýlen Áshimbaev sonymen qatar aımaqtaǵy partııa aktıvimen kezdesti. Onda Prezıdenttiń bes áleýmettik bastamasy jáne jańa partııalyq jobalar boıynsha atqarylǵan jumys barysy, alda turǵan mindetter talqylandy.