Match kezinde jaraqat alǵan «Qaırat» fýtbolshysynyń jaǵdaıy óte aýyr - klýb

ALMATY. QazAqparat - Keshegi match kezinde aýyr jaraqat alǵan «Qaırat» fýtbol komandasynyń oıynshysy Arsen Býranchıevke ota jasaldy, dep habarlaıdy QazAqparat klýbqa silteme jasap.

Esterińizge sala keteıik, keshe ortalyq stadıonda ótken jergilikti «Qaırat» jáne «Aqtóbe» komandalary arasyndaǵy fýtbol matchynda Arsen Býranchıev dopqa talasqan sátte aýyr jaraqat alyp, shuǵyl túrde aýrýhanaǵa jetkizilgen bolatyn.

Qazirgi ýaqytta Arsen reanımatsııada jatyr. Onyń jaǵdaıy óte aýyr. Fýtbolshyǵa dárigerler muqııat qarap jatyr.

«Qaırat» FK men Qazaqstan fýtbol federatsııasynyń basshylary aýrýhanada jáne olar qajetti kómegin kórsetip jatyr.

«BAQ ókilderinen klýbtyń baspasóz qyzmetine júginýin jáne tekserilmegen aqparatty taratpaýyn suraımyz. Biz Arsen úshin alańdap, oǵan tezirek saýyǵyp ketýine tilektespiz» dep habarlady klýbtyń baspasóz qyzmeti.

Arsen Muqashbekuly - qazaqstandyq fýtbolshy, «Qaırat» klýbynyń jáne Qazaqstan jastar quramasynyń jartylaı qorǵaýshysy.

2001 jyly 9 qyrkúıekte Qyrǵyzstan astanasynda dúnıege kelgen.

Fýtboldaǵy jolyn 2018 jyly ekinshi lıgadaǵy «Qaırat M» klýbynyń quramynda bastaǵan.

2021 jyldyń 24 naýryzynda Qazaqstan jastar quramasy sapynda Makedonııa jastar quramasyna qarsy oıynda (2:1) debıýt jasady.

Aıta keteıik, Almatyda keshegi «Qaırat»-«Aqtóbe» matchynan keıin fýtbol jankúıerleri janjal shyǵardy.