Mass-medıa týraly zań qaralady: Palata otyrysynyń kún tártibi bekitildi

<p>ASTANA. KAZINFORM - Senatorlar 6 maýsym kúni ótetin Palata otyrysynda &laquo;Mass-medıa týraly&raquo; jáne oǵan ilespe &ndash; &laquo;Qazaqstan Respýblıkasynyń keıbir zańnamalyq aktilerine mass-medıa máseleleri boıynsha ózgerister men tolyqtyrýlar engizý týraly&raquo; jáne &laquo;Qazaqstan Respýblıkasynyń Ákimshilik quqyq buzýshylyq týraly kodeksine mass-medıa máseleleri boıynsha ózgerister engizý týraly&raquo; zańdardy birinshi oqylymda qaraıdy.</p>

Atalǵan zańdarda qarjylandyrý tetikterine, buqaralyq aqparat quraldarynyń materıaldaryna eskirý merzimin belgileýge, BAQ saýaldaryn qaraý merzimderin qysqartýǵa qatysty jańa normalar usynylyp otyr.

Sondaı-aq depýtattar energetıka salasyndaǵy qoldanystaǵy zańnamany jetildirýge arnalǵan «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly» zańdy birinshi oqylymda qaraıdy.

Halyq, shaǵyn jáne orta bıznes, sharýa jáne fermer qojalyqtaryna jańartylatyn energııa kózderiniń tehnologııasyn paıdalanýdy yntalandyrý úshin zańǵa qýaty 200 kılovattqa deıingi «jańartylatyn energııa kózderin paıdalaný jónindegi shaǵyn aýqymdy obekt» uǵymy engiziledi.

«Dúnıejúzilik saýda uıymyn qurý týraly Marrakesh kelisimine ózgerister engizý týraly hattamany (Balyq aýlaý sýbsıdııalary jónindegi kelisim) ratıfıkatsııalaý týraly» zań da Senat otyrysynyń kún tártibine shyǵaryldy.

Kelisim zańsyz, habarlanbaǵan jáne rettelmegen balyq aýlaýǵa yqpal etetin sýbsıdııalar berýdi shekteý arqyly balyq resýrstarynyń saqtalýyn qamtamasyz etýdi kózdeıdi.