Máslıhattar depýtattyǵyna básekelestik: bir orynǵa 4,3 kandıdattan keledi

ASTANA. QazAqparat – Máslıhattar depýtattyǵyna ortasha básekelestik 4,3 kandıdatty quraıdy. Bul týraly Ortalyq saılaý komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.

«Oblystardyń, respýblıkalyq mańyzy bar qalalardyń jáne astananyń máslıhattary depýtattarynyń 334 mandatyna partııalyq tizim boıynsha usyný kezeńinde saıası partııalar belsendiliginiń jetkilikti dárejede joǵary bolǵanyna nazar aýdaramyn. Mysaly, Jalpyulttyq sotsıal-demokratııalyq partııadan basqa 6 saıası partııa óńirlerdiń kópshiliginde máslıhattardyń depýtattaryn saılaýǵa partııalyq tizimderin usyndy», - dedi Nurlan Ábdirov komıssııa otyrysynda.

Onyń dereginshe, aldaǵy 19 naýryzda ótetin kezekten tys saılaýda oblystar, respýblıkalyq mańyzy bar qalalar jáne Astanada – 334, aýdandarda – 2 130, qalalarda 617 adam máslıhattardyń depýtaty bolyp saılanady. Mandattardyń jalpy sany - 3 081

«Kandıdattardy birmandattyq aýmaqtyq saılaý okýrgteri boıynsha usyný qorytyndylaryna sáıkes, ortasha básekelestik bir orynǵa 4,3 kandıdatty quraıdy. Bul kórsetkish azamattardyń jáne azamattyq qoǵamnyń joǵary belsendiligin aıǵaqtaıdy», - dedi Ortalyq saılaý komıssııasynyń tóraǵasy.