Máslıhat tóraǵalarynyń mindeti popýlızmge ermeı, naqty problemalardy sheshý - Toqaev

ASTANA. QazAqparat –Úkimettiń keńeıtilgen keńesinde Memleket basshysy Qasym-Jomart Toqaev jergilikti máslıhattardyń aldyndaǵy naqty mindetterdi atady, dep habarlaıdy QazAqparat tilshisi.

«Ótken jyldyń sońynda men vıtse-mınıstrler quramynyń sapasyna taldaý júrgizýdi tapsyrdym. Belgili bir deńgeıde jumys júrgizildi. Árbir laýazymdy tulǵaǵa onyń jeke jáne kásibı quzyretterine sáıkes baǵa berildi.

Qazirgi tańda osyndaı taldaý oblys ákimderiniń orynbasarlaryna qatysty júrgizilip jatyr. Úkimet pen ákimshilik kadrlyq sheshimder qabyldaý kezinde qyzmetin ósirý kezinde de, qyzmetinen bosatý kezinde de osy baǵalaý nátıjelerin eskerýi kerek. Jergilikti ózin-ózi basqarýdyń áleýetin kúsheıtý qajet. Bul turǵyda kóp nárse jańadan saılanǵan máslıhattardyń jumys sapasyna baılanysty bolady. Sońǵy áleýmettik saýalnamalarǵa sáıkes, búgingi tańda azamattardyń máslıhattarǵa degen senimi az – tek 53% ǵana», - dedi Qasym-Jomart Toqaev.

Prezıdent keńeske qatysyp otyrǵan jergilik máslıhat tóraǵalaryna: «Sizderdiń birinshi kezektegi mindetterińiz – jeńil popýlızmniń jetegine ermeı, jergilikti turǵyndardyń múddesin qorǵaý. Depýtattar elektorattyń ózekti máselelerin sheshýde kúndelikti qajyrly jumysqa kóship, kásibılik pen jaýapkershilik tanytýǵa tıis. Ákimdiktermen ózara is-qımyl atqarýshy organdar qabyldaıtyn sheshimderdiń ashyqtyǵyn qamtamasyz ete otyryp, syndarly júrgizilýi kerek», - dedi Memlekte basshysy.

Sondaı-aq, Prezıdent eldegi áleýmettik kepildikterdiń kólemi qysqarmaıtynyn aıtty.