Máslıhat ókilderin birlesken zań shyǵarý jumysyna jumyldyrýdyń mańyzy zor - Áshimbaev

ASTANA. QazAqparat - Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti, dep habarlaıdy QazAqparat QR Parlamenti Senatynyń baspasóz qyzmetine silteme jasap.

Onda depýtattar Memleket basshysy Joldaýda belgilep bergen mindetterdi eskere otyryp, Palata jumysynyń jańa sessııadaǵy basymdyqtaryn talqylady. Sondaı-aq is-shara barysynda 14 qyrkúıek kúni ótetin Senat otyrysynyń kún tártibi aıqyndaldy.

Bıýro otyrysynda depýtattar VIIІ shaqyrylymdaǵy Parlamenttiń ІІ sessııasyna arnalǵan Senattyń jańartylǵan negizgi is-sharalar josparyn talqylady. Osyǵan baılanysty Máýlen Áshimbaev senatorlardy ashyq jáne transparentti formatta jumys isteýge, áriptesterimen jáne sarapshylar qaýymdastyǵymen birlesip, dıalog alańdaryna belsendi qatysýǵa shaqyrdy.

«Senattyń ІІ sessııaǵa arnalǵan negizgi is-sharalar jospary Memleket basshysynyń halyqqa Joldaýynda júktelgen mindetter eskerile otyryp pysyqtaldy. Bul is-sharalar múddeli taraptardyń, sarapshylardyń, ártúrli saladaǵy mamandardyń jáne bıznes ókilderiniń qatysýymen ashyq túrde ótýge tıis. Máslıhat ókilderin birlesken zań shyǵarý jumysyna belsendi jumyldyrýdyń da mańyzy zor», – dedi Máýlen Áshimbaev.

Aıta keteıik, Senattyń aldaǵy otyrysynda depýtattar halyqaralyq qyzmetke qatysty birqatar zańdy qaraıdy.

Sonymen qatar Bıýro otyrysynda Májilis qabyldaǵan zańdar jumys úshin Senattyń turaqty Komıtetterine bólinip berildi.