Máslıhat hatshysy elorda ataýyn ózgertýge qatysty shyǵyndarǵa túsinik berdi

NUR-SULTAN. QazAqparat – Nur-Sultan qalalyq máslıhatynyń hatshysy Erlan Kanalımov elordaǵa Astana ataýyn qaıtarý kezinde bolýy múmkin shyǵyndarǵa pikir bildirdi, dep habarlaıdy QazAqparat tilshisi.

Onyń aıtýynsha, 2019 jyly ákimdik tarapynan mańdaıshalardy, blankilerdi, mórlerdi ózgertýge 30 mln teńge jumsalǵan. Al sońǵy úsh jylda barlyq memlekettik organdar tsıfrlyq qujat aınalymyna kóshti.

«Meniń oıymsha, tsıfrlyq qujat aınalymyna kóship jatqanymyzdy eskere otyryp, bıylǵy jyly shyǵyndar áldeqaıda az bolady. Sebebi qazir kóptegen memlekettik organ resmı blankimen eshteńe jibermeıdi. Barlyǵy ETsQ qoldanady», - dedi máslıhat hatshysy.

Erlan Kanalımovtyń sózinshe, elorda ataýyn ózgertken jaǵdaıda ortalyq memlekettik organdar respýblıkalyq bıýdjetten, al jergilikti atqarýshy organdar jergilikti bıýdjet esebinen qarjylandyrylatynyn atap ótti.

Aıta keteıik, buǵan deıin Qarjy mınıstrliginen bas shaharǵa Astana ataýyn qaıtarýǵa qatysty qosymsha shyǵyn bolmaıtynyn málimdegen edi.