Máslıhat depýtattaryn saılaý 26 qazanda ótedi - OSK

ASTANA. QazAqparat - «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń 101-baby 4-tarmaǵyna sáıkes, aǵymdaǵy jyldyń 26 qazanynda respýblıkanyń 13 óńirinde 46 saılaý okrýginde máslıhattardyń shyǵyp qalǵan depýtattarynyń ornyna saılaý ótedi, dep habarlady QR Ortalyq Saılaý Komıssııasynyń baspasóz qyzmetinen.

Barlyǵy 2 oblystyq, 12 qalalyq, 30 aýdandyq jáne 2 Almaty qalalyq máslıhattarynyń depýtattary saılanady. Máslıhattardyń shyǵyp qalǵan depýtattarynyń ornyna saılaýdy tıisti oblystyq jáne Almaty qalalyq saılaý komıssııalary taǵaıyndaıdy. 2014 jylǵy 26 qazanda bolatyn jergilikti ókildi organdardyń shyǵyp qalǵan depýtattarynyń ornyna saılaýdy uıymdastyrýǵa jáne ótkizýge 4 oblystyq, 12 qalalyq, 30 aýdandyq, 46 okrýgtik jáne 193 ýchaskelik saılaý komıssııalary tartylady. Daýys berý ótetin ýchaskelerdiń saılaýshylar tizimine 215 myńǵa jýyq adam engizilgen.

Tıisti aýmaqtyq saılaý komıssııalarynyń sheshimderine sáıkes, okrýgterdiń kóbinde kandıdattardy usyný 25, 26 jáne 27 tamyzda bastalady, al tirkeý 30 qyrkúıek - 1 qazanǵa deıin sozylady.

«Osylaısha, aǵymdaǵy jyldyń tamyz ben qyrkúıek aılarynda elimizde eki saılaý naýqany - Parlament Senaty depýtattarynyń kezekti saılaýy men máslıhattardyń shyǵyp qalǵan depýtattarynyń ornyna saılaý bir mezgilde júredi», delingen habarlamada.