Máslıhat depýtattary elordada gazben júretin kólikterdiń qaýipsizdigine alańdaýshylyq bildirdi
Qalalyq máslıhatynyń tótenshe jaǵdaılardyń aldyn alý jáne órt qaýipsizdigi máseleleri jónindegi turaqty komıssııasynyń otyrysynda osyndaı másele qaraldy.
Máslıhat ókilderi qala irgesindegi jeke turǵyn úılerde gaz ballondary talapqa saı paıdalanylmaı jatqanyn aıtyp, janarmaı júıesi gazǵa aýystyrylǵan kólikterdiń qaýipsizigine alańdaýshylyq bildirdi.
Tótenshe jaǵdaılar departamenti bastyǵynyń orynbasary Qýanar Bazarbaevtyń aıtýynsha, bul eki másele de tótenshe jaǵdaı, polıtsııa jáne memlekettik kiris organdarynyń ókilderinen quralǵan komıssııanyń baqylaýynda tur.
«Qala ákiminiń tapsyrmasy boıynsha jeke turǵyn úılerdegi órt qaýipsizdigin baqylaıtyn komıssııa qurylǵan. Onyń quramyna bizden bólek polıtsııa departamenti, salyq organdary kiredi. Komıssııa aıasynda sol qyzmettermen birge gaz ballonyn paıdalyp otyrǵan 199 úıdi aralap shyqtyq. Onyń ishinde 10 jaǵdaı boıynsha sottyń sheshimi shyqty. Biz ózimizdiń departament tarapynan 1350 úıdi aralap shyqtyq. Komıssııa bul másele boıynsha jumys istep jatyr. Endi sol jumysty taǵy da kúsheıte túsý kerek shyǵar. Óıtken atalǵan úıler shynymen problema bolyp tur», - dedi departament ókili.
Sondaı-aq, ol parkıngterdi órt qaýipsizdigin saqtamaıtyn kólikterden tazartý isinde turǵyndardyń belsendiligi mańyzdy ekenin atady.
«Bizdiń qyzmet Іshki ister mınıstrliginiń júıesinde bolǵan kezde gaz ballony ornatylǵan kólikterdi parkıngterde qańtarýǵa bolmaıtyny týraly qaýly shyqqan bolatyn. Bizdiń mamandar barlyq kóppáterli úılerdegi úı ıeleriniń chattaryna qosylǵan. Órt qaýpiniń aldyn alý úshin parıkngke gaz qondyrǵysy ornatylǵan kólikti qańtarýǵa tyıym salynǵany týraly aqparattarymyzdy sol chattarǵa salyp otyramyz. Eger turǵnydardan bireý júginip jatsa, dereý áreket etemiz. Ondaı da bolǵan. Bizge túsken habar boıynsha oqıǵa ornyna shyǵyp, ýchaskelik polıtsııamen birge álgi kólikti parıkngten alyp shyǵarǵan bolatynbyz», - dedi Qýanar Bazarbaev.