Qazaq mádenıetine degen qyzyǵýshylyǵy kútpegen jerden — Almatydan bitirý keshine arnalǵan kóılek izdeý kezinde jáne Qaırat Nurtastyń ánderin tyńdaǵannan keıin oıanǵan.
– Maǵan qazaq estradasynyń ánshisi Qaırat Nurtas óte qatty unaıdy. Onyń suhbattaryn jıi kóremin. Ózi kóńildi, aqjarqyn, ashyq adam eken. Ánderiniń de yrǵaǵy men sózi birden baýrap alady, – deıdi Krıstına «PRESIDENT» jobasynyń júrgizýshisi Ádil Baltabaevqa bergen suhbatynda.
Ol qazaq tiline qalaı qyzyǵa bastaǵanyn da esine alady.
– Toǵyzynshy synypta oqyp júrgenimde bitirý keshine kóılek izdep, Instagram jelisin aqtara bastadym. Kórgen ádemi kóılekterimniń kóbisi Qazaqstanda, Almatyda satylatynyn baıqadym. Sol kezde «Qandaı ádemi el, mádenıeti de erekshe shyǵar» dep oıladym. Sodan keıin qazaq tilin úırenýge, eldiń mádenıetin jaqynyraq tanýǵa qyzyǵýshylyǵym artty. Maǵan Qazaqstan qatty unaıdy, tabıǵaty da, adamdary da, tili de ádemi, – deıdi ol.
Qazir Krıstına - Máskeý memlekettik halyqaralyq qatynastar ınstıtýtynyń stýdenti. Qazaq tilin júıeli túrde meńgerip, qazaq mýzykasy men ádebıetin qyzyǵa oqyp júr. Ol aldaǵy ýaqytta Qazaqstanǵa taǵy kelip, tildik ortada tájirıbesin jetildirýdi josparlap júr.
Aıta keteıik, keshe Prezıdent Máskeýdegi halyqaralyq qatynastar ınstıtýtynyń stýdentterimen áńgimelesti.