Máskeýden tabylǵan qazaqstandyq jaýyngerdiń súıegi elge ákelinedi

<p>Máskeýdegi Qazaqstannyń Elshiliginde Ekinshi dúnıejúzi soǵysynda qaza tapqan qazaqstandyq jaýyngerdiń súıegin tapsyrý rásimi ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a> elshilikke silteme jasap.</p>

Olardy osy jyldyń mamyr aıynda Máskeý túbindegi Apalşıno aýyly mańynan «Eho Voıny» toby izdep tapqan.

Jaýyngerdiń medalonynda saqtalǵan jazbanyń arqasynda Qyzylorda oblysy Qazaly aýdandyq voenkomatynan áskerge shaqyrylyp, 144-atqyshtar dıvızııasynyń 785-atqyshtar polkiniń quramynda soǵysyp, 1941 jyly 7 qarashada Máskeýdi qorǵaý kezinde qaza tapqan Seılan Mámetovtiń (1912 jyly týǵan) jeke basyn anyqtaý múmkin boldy.

Qazaqstannyń Reseıdegi Elshisi Dáýren Abaev búgingi shara bolashaq urpaq úshin qurban bolǵan jaýyngerlerge taǵzym ekenin atap ótti.

Foto: Qazaqstannyń Reseıdegi Elshiligi

«Sol kezdegi adamdardyń erligi týraly estelik qazaqstandyqtardyń júreginde máńgi qalady, kitaptarda, ánderde, monýmentterde, memorıaldarda, murajaılar ekspozıtsııalarynda jáne kóshe ataýlarynda beınelenedi, — dep atap ótti Dáýren Abaev. - Sizderdiń eńbekqorlyǵyńyz ben adaldyǵyńyz tań qaldyrady. Sizder tarıhı jad pen azattyǵymyz úshin kúresken tulǵalardy qurmetteýge baǵa jetpes úles qosasyzdar».

Óz kezeginde «Eho Voıny» izdeý jasaǵynyń komandıri Gennadıı Ivanov Seılan Mámetov sııaqty jaýyngerlerdiń arqasynda jaý Máskeýdi ala almaǵanyn atap ótti.

«Ol óz ómirin Jeńis jolynda qurban etti. Ózin aıamady, qoryqpady, berilmedi, áskerı boryshyn sońyna deıin oryndady. Qazir beıbit ómir súrip jatqanymyz úshin alǵysymyz sheksiz», — dep atap ótti Gennadıı Ivanov.

Foto: Qazaqstannyń Reseıdegi Elshiligi

Seılan Mámetovtiń týystary áli tabylǵan joq. Súıegi Qazaqstanǵa jetkizilip, tolyq áskerı qurmetpen jerlenedi.

Qaza tapqan jaýyngerlerdiń súıegin tabý boıynsha qazaqstandyq jáne reseılik izdeý toptarynyń birlesken jumysy jalǵasady.