Máskeýdegi paradqa Qazaqstannan 6 soǵys ardageri barady

ASTANA. QazAqparat - Máskeýdegi paradqa Qazaqstannan 6 UOS ardageri barady. Bul týraly búgin baspasóz máslıhatynda Astana qalasynyń Jumyspen qamtý jáne áleýmettik baǵdarlamalar basqarmasy basshysynyń orynbasary Meıirlan Narynbetov málim etti.

«Máskeýdegi paradqa Qazaqstannan 6 soǵys ardageri barady jáne onyń ishinde bireýi - Astanadan. Ardagermen birge qaladaǵy áskerı gospıtaldiń bas dárigeri erip barady. Elimizdiń ardagerleri Máskeýge 7 mamyrda attanady. Olardy Reseı Prezıdenti qabyldaıdy dep kútilýde. Atap aıtqanda, bizdiń ardagerlerdi qarsy alý, olar qatysatyn sharalar kestesi bekitilgen»,-dedi ol.

Onyń sózine qaraǵanda, Máskeý tarapynan elimizden 6 ardagerge kvota berilgen. «70 jyldyq aýqymdy kólemde atalyp ótkendikten, RF astanasyna kelip jatqan meımandardyń qarasy qalyń. Óıtkeni, bul ataýly dataǵa erekshe mán berilip otyr»,-dedi M. Narynbetov.