Máskeýdegi qazaqstandyq stýdentter saıası qýǵyn-súrgin qurbandaryn eske aldy

MÁSKEÝ. QazAqparat - Máskeýde bilim alyp jatqan qazaqstandyq stýdentter saıası qýǵyn-súrgin qurbandaryn eske aldy. Reseı Federatsııasyndaǵy Qazaqstan Respýblıkasynyń Elshiliginiń qoldaýymen uıymdastyrylǵan dóńgelek ústel barysynda «Jas Tulpar» qazaqstandyq stýdentter birlestigi «Alash» partııasynyń 100 jyldyq tarıhy men onyń jetekshileriniń taǵdyryn talqylady, dep habarlaıdy «QazAqparat» HAA tilshisi.

«Reseıdegi «Jas Tulpar» qazaqstandyq stýdentter birlestigi halqymyz úshin, bizdiń táýelsizdigimiz úshin janyn qıǵan saıası qýǵyn-súrgin qurbandaryn eske alýǵa arnalǵan mańyzdy tarıhı is-shara ótkizip jatyr. Bıyl «Alash Ordanyń» júz jyldyǵy, sondyqtan biz - qazaqstandyq stýdentter - jınalyp,  árbir keıipkerdiń, árbir tulǵanyń ómirin talqylaýdy uıǵardyq», - dedi sharanyń maqsaty týraly Máskeýdegi qazaqstandyq stýdentter birlestiginiń tóraǵasy, RF Prezıdenti janyndaǵy memlekettik qyzmet jáne Reseı halyq sharýashylyǵy akademııasynyń magıstranty Muhtar Baımaǵulov.

Sharaǵa qonaq retinde qazir Reseı astanasynda júrgen belgili qazaqstandyq jazýshy jáne dramatýrg Dýlat Isabekov qatysty. Dóńgelek ústel barysynda qatysýshylar óz baıandamalaryn usynyp, Ahmet Baıtursynov, Júsipbek Aımaýytov, Mirjaqyp Dýlatov, Maǵjan Jumabaev jáne basqa da qazaq zııalylarynyń ómirbaıanyn talqylady.