Máskeýdegi forýmda Qazaqstandaǵy atom energetıkasynyń damýy týraly aıtyldy

MÁSKEÝ. QazAqparat - Máskeýde «AtomEko-2017» halyqaralyq forýmy aıasynda «AES qurylysynda qoǵammen ózara is-qımyldyń zamanaýı formattary. Reseı men sheteldik tájirıbe» taqyrybynda dóńgelek ústel ótti, dep habarlaıdy «QazAqparat» HAA menshikti tilshisi.

Іs-sharaǵa jaqyn jáne alys shet elderdiń birqatar atom energetıkasy ókilderi, sondaı-aq qazaqstandyq taraptan Qazaqstannyń ıadrolyq qoǵamy (QıAQ) qatysty.
 

Dóńgelek ústel barysynda QıAQ dırektory Natalıa Jdanova Qazaqstanda júrgizilip jatqan halyqtyń atom energetıkasy týraly obektıvti qoǵamdyq pikirin qalyptastyrý boıynsha jumystary jaıly aıtty.

«Atomdyq tehnologııalardyń medıtsınada, ónerkásipte jáne basqa salalarda qoldanylatyndyǵyn bári bile bermeıdi. Sonymen qatar, Qazaqstanda atom salasy men ıadrolyq tehnologııalar belsendi damyp keledi», - dedi N.Jdanova QıAQ jumysynyń baǵyty týraly.

«Basty maqsat - atom energetıkasynyń damýy týraly obektıvti aqparat berý. Onyń paıdaly jaqtary kóp. Adamdar ol týraly habardar bolyp, múmkindikterin durys baǵalaýy tıis», - dep atap ótti ol.
 

Onyń aıtýynsha, osy maqsatta respýblıkada eki jyldan beri atom energııasy jónindegi aqparattyq ortalyq jumys istep jatyr. Ol barlyq turǵyndarǵa tegin qyzmet kórsetedi.

Sondaı-aq, QıAQ dırektory osy jumysty júzege asyrýǵa Indýstrııa 4.0. baǵdarlamasynyń yqpal etip jatqanyn tilge tıek etti.