Máskeýdegi №229 orta mektepke Baýyrjan Momyshulynyń esimi berildi

MÁSKEÝ. Naýryzdyń 23-i. QazAqparat /Narymbek Ysmaǵulov/ - Máskeýdegi №229 orta jalpy bilim beretin mektepke qazaqtyń ańyzǵa aınalǵan qaharman qolbasshysy, Keńes Odaǵynyń Batyry Baýyrjan Momyshulynyń esimi berildi, dep habarlady Qazaqstannyń Reseıdegi elshiliginiń baspasóz qyzmeti.

«Qala meriniń 2010 jylǵy naýryzdyń 19-yndaǵy sheshimimen Máskeý qalasyndaǵy №229 jalpy bilim beretin mektepke Keńes Odaǵynyń Batyry Baýyrjan Momyshulynyń esimi berildi», - delingen habarlamada.

Búginde Zelenogradtyń ortalyǵynda, Krıýkovo stansysynyń janynda ornalasqan qaladaǵy baıyrǵy mektep tańdalýynyń tarıhı máni bar. Uly Otan soǵysy kezinde Máskeý úshin osy jerde qantógisti shaıqas ótken jáne onda general I.V.Panfılovtyń basshylyǵymen 316-shy dıvızııa jaýyngerleri máńgi óshpes erliktiń ónegesin kórsetken bolatyn.

Endi bıylǵy mektep oqýshylary qaharman batyr esimindegi jańa ataýy jazylǵan mekteptiń attestatyn alatyn bolady. Búgingi tańda qazaqstandyq taraptyń járdemdesýimen mektepti zamanaýı oqý-tehnıkalyq jabdyqtarmen jaraqtandyrý jumystary júrgizilýde. Bıyl Baýyrjan Momyshulynyń 100 jyldyq torqaly merekesi jyly mektepte onyń músini qoıylady jáne batyr atyndaǵy murajaı ashylady. Elshilik qazirdiń ózinde mektepke B.Maılın, І.Jansúgirov, Ol.Súleımenov, Á.Álimjanov, B.Qanapııanov, G.Belger, M.Zverev jáne basqa da qazaqstandyq avtorlardyń kitaptaryn syıǵa tartty.

Uly Jeńistiń 65 jyldyǵyn merekeleý qarsańynda, mamyrdyń 1-inde Zelenogradtaǵy Shyǵarmashylyq saraıynyń aldynda, Panfılov dańǵylynda Aıman Musaqojaevanyń basqarýymen Eýrazııalyq sımfonııalyq orkestr kontsert uıymdastyrmaq.