Máskeýde tolassyz jaýǵan qardan 70-ten astam reıs keshikti

ASTANA. TASS-QazAqparat – Reseı astanasynda qar úıindileri bir kúnde 25 sm-ge ósti. Máskeý ákiminiń orynbasary Petr Bırıýkovtiń aıtýynsha, jalpy jeltoqsannyń basynan beri 2,5 aılyq normaǵa jýyq qar jaýdy, dep jazady QazAqparat TASS aqparat agenttigine silteme jasap.

«Bıyl naǵyz qys boldy, qarasha aıynyń ózi qarly boldy – jaýyn-shashynnyń aılyq normasy saqtalǵan. Jeltoqsanǵa kelsek, bul sońǵy 80 jylda birinshi ret bolyp tur. Búgingi kúnge deıin jaýyn-shashynnyń 2,5 aılyq normasy jaýǵan. Tek búgin ǵana qalanyń keı jerlerinde táýligine 25 sm ne odan da kóp qar jaýsa, jekelegen aýdandarynda aılyq normanyń 60%-dan astam kóleminde – 39 sm qar túsken. Qalada qosymsha adam resýrstary men tehnıkalyq jumyldyrý boıynsha búkil qajetti sharalar qabyldandy», - dedi Petr Bırıýkov.

Onyń aıtýynsha, jeksenbi kúni qalada qar jınaý jumysyna qosymsha 40 myń adam tartylǵan, barlyǵy 120 myńǵa jýyq jumysshy qyzmet etip júr.

Sondaı-aq, 14,2 myńǵa jýyq túrli tehnıka qoldanylǵan.

BBC málimetinshe, Máskeý áýejaılarynda 70-ten astam reıs keshikken jáne keıinge qalǵan.

Áýejaılar qalyń qarǵa qaramastan shtattyq rejımde jumys isteıdi. Biraq reıster keshigedi, óıtkeni ushaqtardy antıfrızben muqııat óńdeý kerek.

Keshe úsh áýejaıda barlyǵy 62 reıs keshikken jáne 13 reıs keıinge qalǵan.

Foto: Sergeı Fadeıchev/TASS