Máskeýde TMD aıasynda SІM aralyq konsýltatsııa uıymdastyrylady
07:56, 16 Sáýir 2018
ASTANA. QazAqparat - 2018 jyldyń 18-19 sáýir aralyǵynda Máskeýde TMD aıasynda «Ózara tıimdi ekonomıkalyq yntymaqtastyq salasyndaǵy ıntegratsııalyq protsesterdiń keleshegin keńeıtý jáne kúsheıtý týraly» taqyrybynda syrtqy ister mınıstrlikteri aralyq konsýltatsııasy ótedi. Bul týraly QazAqparat TMD Atqarý komıtetiniń baspasóz qyzmetine silteme jasap habarlaıdy.
Іs-shara qatysýshylary 2007 jyly qabyldanǵan Táýelsiz Memleketter Dostastyǵyn budan ári damytý kontseptsııasynyń ekonomıkaǵa qatysty baptaryn qaraý jóninde máselelerdi talqylaıdy.
Sondaı-aq, Erkin saýda aımaǵy týraly kelisimdi júzege asyrý aıasynda TMD aýmaǵynda ıntegratsııalyq protsesterdi kúsheıtýdiń túrli aspektileri qarastyrylady. Atap aıtqanda, ózara saýda kólemin ulǵaıtý jáne transshekaralyq kedergilerdi azaıtý quraly retinde ózara saýda men elektrondy saýdadaǵy shekteýli sharalardy joıý boıynsha jumystardy jandandyrý máselesi qaralmaq.
Budan bólek, konsýltatsııa qatysýshylary Táýelsiz Memleketter Dostastyǵy men Eýrazııalyq ekonomıkalyq odaq qyzmetiniń ekonomıkalyq baǵyttaryn túıindeý máselelerin talqylaıdy.