Máskeýde tapsyryspen alynǵan taǵamnan 10-nan astam adam ýlandy

<p>ASTANA. KAZINFORM &ndash; Reseı Federatsııasynyń Tergeý komıteti 10-nan astam adamnyń azyq-túlik jetkizý qyzmeti arqyly tapsyrys bergen ónimderden ýlanýyna qatysty qylmystyq is qozǵady.</p>

Bul týraly Reseı Tergeý komıtetiniń Máskeý boıynsha Bas tergeý basqarmasy basshysynyń aǵa kómekshisi ıÝlııa Ivanova málim etti, dep habarlaıdy TASS aqparat agenttigi. 

«14-15 maýsym aralyǵynda 10-nan astam adam tamaqtan ýlaný belgilerimen qalalyq aýrýhanalarǵa medıtsınalyq kómekke júgingen. Reseı TK Máskeý qalasy boıynsha Bas tergeý basqarmasyna qarasty Soltústik-Batys ákimshilik okrýgi boıynsha Tergeý basqarmasynyń erekshe mańyzdy isterdi tergeý bólimi RF Qylmystyq kodeksiniń 238-babymen (tutynýshylardyń ómiri men densaýlyǵynyń qaýipsizdigine qoıylatyn talaptarǵa saı kelmeıtin qyzmetterdi kórsetý) qarastyrylǵan qylmystyq is qozǵady», - dedi ol.

Tergeýshiler ónim satylatyn oryndarda tintý júrgizip, kýágerler men jábirlenýshilerden jaýap alýda. Tergeý komıteti Rospotrebnadzormen birge ónim shyǵaratyn uıymdardyń qujattaryn tekserýde. Olardyń sapasy baǵalanady.

Máskeýlik Rospotrebnadzordyń naqtylaýynsha, zardap shekkender «Lokalkıtchen» («Aýdandaǵy as úı») JShS-nen lobıo jáne «Gastroport» JShS-nen týnets, úrmeburshaq jáne alma qosylǵan salatqa tapsyrys bergen. Vedomstvo olardyń satylýyn sanıtarlyq-epıdemıologııalyq tekserý aıaqtalǵansha toqtatty.

Qalalyq prokýratýra 18 ben 60 jas aralyǵyndaǵy adamdardyń ýlanǵanyn qosyp ótti. Prokýrorlar epıdemıologııalyq tergeý men qylmystyq istiń barysyn baqylaýǵa aldy.