Máskeýde Saǵadat Nurmaǵambetovtyń 100 jyldyǵy atalyp ótti
100 jyldyq mereıtoı, 25 mamyrda Jeńis alańynda máńgilik alaýdyń janyna gúl shoqtaryn qoıýdan bastaldy.
Qazaqstannyń Reseıdegi elshiligi, áskerı attashe apparatynyń qyzmetkerleri, Máskeýdegi joǵary oqý oryndarynda oqıtyn QR Qorǵanys mınıstrliginiń áskerı qyzmetshileri men kýrsanttary Otan úshin qaza tapqan jandardy eske aldy.
Sodan soń qonaqtar Jeńis murajaıynda armııa generaly Saǵadat Nurmaǵambetovtyń «Jeńis adamdary» jalpyhalyqtyq tarıhı depozıtarııiniń bazasyna derbes derekterdi saltanatty túrde engizý rásimine qatysty. Bul 150 mıllıonnan astam taǵdyrdy saqtaýǵa arnalǵan jáne natsızmdi jeńgen urpaqtyń máńgilik izin qaldyrýǵa arnalǵan «halyqtyq ekspozıtsııa».
«Jeńis murajaıynda qazaq halqy ulynyń mereıtoıyn atap ótý biz úshin úlken mártebe. Onyń Otanǵa janqııarlyqpen qyzmet etýi óskeleń urpaqqa úlgi. Búgingi is-sharaǵa Máskeý áskerı oqý oryndary jas kýrsanttarynyń qatysqany óte mańyzdy», - dep atap ótti Qazaqstannyń Reseıdegi elshisi Dáýren Abaev.
Dıplomatııalyq ókildiktiń basshysy Saǵadat Nurmaǵambetovtyń táýelsiz Qazaqstan tarıhynda birinshi bolyp «Halyq qaharmany» ataǵyn alǵanyn eske saldy. Búginde onyń ómir joly, dúnıetanymy jáne áskerı qolbasshy retindegi bilimi kóptegen zamandasyna úlgi.
Jeńis saıabaǵyna barǵan is-shara qatysýshylary «Skorb» (qaıǵy) músinine gúl shoqtaryn qoıyp, «Berlınge shabýyl» dıoramasymen tanysty, sondaı-aq, armııa generaly Saǵadat Nurmaǵambetovtyń qurmetine arnalǵan ekspozıtsııany tamashalady. Onda otbasylyq muraǵattan alynǵan ómirbaıandyq málimetter men fotosýretter jáne batyrdyń qola bıýsti usynyldy.
Jeńis murajaıynyń bas dırektory Aleksandr Shkolnık atalǵan is-shara murajaı úshin mańyzdy oqıǵa ekenin aıta kele, Keńes Odaǵynyń batyry Saǵadat Nurmaǵambetovtyń taǵdyrynan bastap jobanyń jańa betin, ıaǵnı jeńiske úles qosqandardyń barlyǵyn eske alý úshin qurylǵan «Jeńis júzderi» jobasynyń ashylǵanyn aıtty.
«Biz munda otbasylyq tarıhty, soǵys jyldaryndaǵy barlyq urpaq ókilderiniń fotosýretteri bar ańyzdardy jınaımyz. Biz úshin Qazaqstannyń bul jobaǵa qosylýy óte mańyzdy jáne biz Qazaqstannyń barlyq azamaty batyr ata-babasyn eske alyp, Jeńis murajaıyna fotosýretterdi, tarıh pen otbasylyq ańyzdy jiberedi degen úmittemiz. Sodan soń Jeńis murajaıyna kelip, óz batyryn «Jeńis júzderi» degen atpen kóre alady», - deıdi Aleksandr Shkolnık.