Máskeýde oqıtyn qazaqstandyq polıtseı kishkentaı balany apattan qutqaryp qaldy
Aqmola oblysy polıtsııa departamenti aǵa krımınalısti Zarına Jumanbek búginde Reseı ІІM Basqarý akademııasynda «Krımınalıstıka jáne sot-saraptama qyzmeti» mamandyǵy boıynsha bilim alýda.
«Aǵymdaǵy jyldyń 16 mamyrynda jataqhanaǵa bet alǵan polıtsııa aǵa leıtenanty Zarına Jumanbek eki balasymen tramvaı jolynan ótip bara jatqan áıeldi baıqaǵan. Sol sátte qatty soqqan jel kishkentaı qyzdardyń biriniń bas kıimin ushyryp áketedi. Ony alý úshin jolǵa júgirgen búldirshin kele jatqan tramvaıdy kórmegen. Oqıǵany syrttaı baqylap, saq turǵan Zarına jedel áreket etip, balany ajaldan arashalap qaldy», - dep jazdy Aqmola oblysy PD baspasóz qyzmeti áleýmettik jelidegi paraqshasyna.
Zarınamen birge oqıtyn akademııa stýdentteriniń aıtýynsha, tramvaı júrgizýshisi jedel tejegish basqanymen, kólik 12 metr júrip baryp qana toqtaǵan. Qazaqstandyq polıtseıdiń erligine tánti bolǵan stýdentter bolǵan jaǵdaıdy akademııa basshylyǵyna aıtqan.
«Zarına Jumanbek bul áreketi arqyly kásibı sheberliktiń, batyldyqtyń jáne tótenshe jaǵdaıda naqty sheshim qabyldaı alýdyń joǵary deńgeıin kórsetti», - dedi Reseı ІІM Basqarý akademııasy jetekshileriniń biri Grıgorıı Skrıpkın.
Oqý ornynyń basshylyǵy jerlesimizdiń erligin erekshe baǵalap, Qurmet gramotasymen marapattady.