Máskeýde Naýryz meıramyna oraı saltanatty shara ótti

MÁSKEÝ. QazAqparat - Naýryz meıramyna oraı Qazaqstan Respýblıkasynyń Reseı Federatsııasyndaǵy Elshiligi saltanatty shara uıymdastyrdy. Oǵan respýblıka dostary - kórnekti reseılik saıasatkerler, bıznesmender, mádenıet, ǵylym qaıratkerleri, RF jetekshi BAQ bas redaktorlary, sonymen qatar Máskeýde akkredıttelgen sheteldik dıplomatııalyq korpýs pen halyqaralyq uıymdardyń basshylary keldi. Bul týraly QazAqparat HAA menshikti tilshisi syrtqy saıası mekemeniń baspasóz qyzmetine jasap habarlaıdy.

Keshtiń ashylýynda Qazaqstan Respýblıkasynyń Reseı Federatsııasyndaǵy Tótenshe jáne Ókiletti Elshisi Imanǵalı Tasmaǵambetov Naýryz Shyǵysta jyl basyn bildiretin ejelgi meıram ekenin eske saldy.

«Qazaqstannyń jaqyn dostary osy kúni bizdi quttyqtap, merekeni birge atap ótýge kelgenine qýanyshtymyz», - dedi ol.

Mártebeli meımandar ulttyq naqyshtaǵy mádenı baǵdarlamany tamashalady.

«Farab» bı teatry aqqý men Tumar hanymnyń obrazdaryn beınelep berdi. Máskeýlik aýdıtorııa aldynda «Astana opera» teatrynyń jetekshi solısi, reseılik «Úlken opera» jobasynyń jeńimpazy Saltanat Ahmetova, opera ánshileri Talǵat Musabaeva pen ıÝlııa Savchenko, halyqaralyq baıqaýlardyń laýreattary Stanıslav Savva men Darıa Kamınskaıa, pıanınoshy Aleksandr Strahov, «Alataý» folklorlyq ansambli óner kórsetti.

Kórermender sondaı-aq eýropany baǵyndyryp úlgergen qazaqstandyq dızaıner Irına Nabokonyń sán kórsetilimin tamashalady.

Sharaǵa kelgen qonaqtar óz áserimen bólisip, qazaqstandyqtardy Naýryz merekesimen quttyqtap jatty.

Ataqty shahmatshy, álem chempıony Anatolıı Karpov Astana men Almatydaǵy shahmat mektepteriniń ashylýyna kómekteskenin aıtyp, sońǵy kezderi Qazaqstan shahmatynda jarqyn esimder shyǵyp kele jatqanyn atap ótti. Ol Naýryzdy tuńǵysh ret toılap otyrǵanyn aıta kele, qazaqstandyqtardy osynaý merekemen quttyqtady.

Tanymal ánshi ári kompozıtor Oleg Gazmanovtyń aıtýynsha, Naýryz dostarmen kezdesýge jaqsy múmkindik.

«Shynaıy dostar úshin ýaqyt ta, qashyqtyq ta kedergi bola almaıdy. Búgin men kontsertten úlken áser aldym. Qazaqstanda talanttar óte kóp», - dedi mýzykant.

Merekelik shara joǵary deńgeıde ótip, qazaqtyń mádenıetimen qosa Reseı astanasyna kóktemgi jylýlyq, kóterińki kóńil-kúı syılady.

Avtor: Medet Ahmetov