Máskeýde N.Tilendıev atyndaǵy etnografııalyq orkestrdiń kontserti ótti

MÁSKEÝ. QazAqparat – Qazaqstandyq ártister Máskeýdiń Gnesın atyndaǵy Reseı mýzykalyq akademııasynda etnografııalyq kontsert berdi, dep habarlaıdy «QazAqparat» HAA menshikti tilshisi.

QR Mádenıet jáne sport mınıstrligi uıymdastyrǵan is-shara mýzykatanýshy-etnograf, kompozıtor, Qazaqstannyń halyq ártisi Aleksandr Zataevıchtiń týǵanyna 150 jyl tolýyna oraı ótti.

Bas dırıjer, QR eńbek sińirgen qaıratkeri Dinzýhra Tilendıevanyń basshylyǵymen N.Tilendıev atyndaǵy «Otyrar sazy» folklorlyq-etnografııalyq orkestri qazaq halyq shyǵarmashylyǵynyń jaýharlaryn, E.Brýsılovskıı, Abaı, N.Tilendıev, Qurmanǵazy, Dáýletkereı týyndylaryn oryndady.

Sondaı-aq, sahnada tanymal qazaqstandyq ártister men shyǵarmashylyq ujymdar óner kórsetti. Olardyń qatarynda Aıgúl Úlkenbaeva, Erkin Shúkimanov, Dastan Esentemirov, Ardaq Balajanova, Dýlat Toqanov, Perızat Turarova jáne taǵy basqalar boldy.

Qurmanǵazy atyndaǵy Qazaq ulttyq konservatorııasynyń rektory, QR eńbek sińirgen qaıratkeri Arman Júdebaevtyń aıtýynsha, shara QR Tuńǵysh Prezıdenti Nursultan Nazarbaevtyń «Rýhanı jańǵyrý» baǵdarlamasynda jáne «Uly dalanyń jeti qyry» maqalasynda kórsetilgen bastamalaryn júzege asyrý aıasynda uıymdastyrylǵan.