Máskeýde Leonıd Mlechınniń qańtar oqıǵasy týraly kitabynyń tusaýy kesildi
Jıynnyń ashylýynda Qazaqstannyń Reseıdegi Tótenshe jáne Ókiletti Elshisi Ermek Kósherbaev kelýshilerge 2022 jyl mıllıondaǵan qazaqstandyqtar úshin ádettegideı ómir saltyn ózgertken, olardyń ómirin «buryn» jáne «keıin» dep bólgen oqıǵalarmen este qalǵanyn aıtty.
«Biz elimizdiń táýelsiz damý tarıhyndaǵy asa qaıǵyly sátti bastan ótkerdik. Shyn máninde, respýblıkanyń memlekettiligi men egemendigine qater tóndi», - dedi Ermek Kósherbaev.
Dıplomatııalyq ókildik basshysynyń aıtýynsha, sońǵy aılarda BAQ pen blogosferada kóptegen maqalalar men jarııalanymdar shyqqan, biraq shyn máninde qańtardaǵy oqıǵalardyń sebepteri men jaǵdaılaryn tereń túsinýge áreket bolǵan joq. Bul olqylyqty óziniń zertteýinde áıgili reseılik jýrnalıst, pýblıtsıst Leonıd Mlechın toltyrýǵa tyrysqan.
«Kitapty jazý kezinde avtor Qazaqstanǵa baryp, tikeleı kýágerlermen, oqıǵalarǵa qatysýshylarmen jeke kezdesken, qujattardy zerttep, bolǵan oqıǵanyń aıqyn beınesin jasaý úshin oqıǵa oryndaryna barǵan. Oqyrmandar kitaptan buryn kópshilikke jarııalanbaǵan kóptegen faktilerdi bile alady», - dedi QR elshisi.
Avtordyń aıtýynsha, bul kitap sol kezeńdegi oqıǵalardy sıpattaýdan, qatysýshylarmen jáne kýágerlermen – polıtseılermen, tuzaqqa túsken adamdarmen, zardap shekkendermen jáne keremet batyldyq tanytqandarmen suhbattan quralǵan.
«Qańtar aıyndaǵy oqıǵalar orasan zor mańyzǵa ıe, óıtkeni Qazaqstan bizge kórshi, seriktes, odaqtas jáne dos memleket. Biz Qazaqstanda bári jaqsy bolatynyna óte múddelimiz. Bul oqıǵalar Ortalyq Azııadaǵy eń turaqty memlekette boldy. Bul elde kenetten ne bolǵany ózime de qyzyq boldy. Ekinshiden, adamnan órkenıettiń osyndaı juqa qabaty qandaı jyldamdyqpen túsetinine tań qaldym. Almatyda maǵan aıtqan oqıǵalar, sol kezde adamdardyń basynan ótkergeni meni tań qaldyrdy. Jáne úshinshisi, Qazaqstannyń taǵdyry bir adamǵa, el Prezıdentine baılanysty boldy», - dedi Leonıd Mlechın.
Sonymen birge, kitap avtory kásibı dıplomat Qasym-Jomart Toqaevtyń eń mańyzdy, betburys kezeńinde kórsetken kóshbasshylyq qasıetterin kópshilik baǵalaı qoımaǵanyn aıtty.
«Jáne kóptegen adamdar túrli sebeptermen qate tujyrymda boldy. Men o basta-aq, muny Qazaqstan úshin sırek kezdesetin sáttilik dep eseptedim. Prezıdent Toqaev sol jerde bolǵan jaǵdaıdy sheship, eldi osy aýyr daǵdarystan shyǵaryp qana qoımaı, jańa ómir bastady. Elge alǵa jyljýǵa múmkindik berdi», - deıdi jazýshy.
Qaıǵyly qańtardaǵy oqıǵalardyń bastalýy týraly aıta otyryp, Leonıd Mlechın buǵan tıisti sebepter de bolǵanyn aıtty.
«Resmı sebep – ońaı sheshilýi tıis gaz baǵasynyń qymbattaýy boldy, gaz baǵasy bul salada úlken mańyzǵa ıe. Biraq naqty sebep, shamasy, bireý Memleket basshysynan qutylǵysy keldi, onyń saıasatyn, sybaılas jemqorlyqqa qarsy belsendiligin, eldiń ashyqtyǵyn, eldiń alǵa jyljýyna baǵyttalǵan is-áreketin unatpady jáne gaz baǵasy jaqsy sebep boldy», - dep atap ótti ol.
Pýblıtsıstiń pikirinshe, mundaı tragedııa endi qaıtalanbaýy úshin Qańtar oqıǵalarynan sabaq alý kerek.
«Meniń oıymsha, munda eki negizgi sabaq bar. Ne jáne qalaı bolǵanyn muqııat jáne naqty zertteý kerek. Bul suraqtarǵa jaýaptar áli berilgen joq – barlyq qylmystyq ister áli qaralǵan joq, barlyq sot úkimderi shyǵarylǵan joq. Ekinshisi, men úshin eń bastysy, biz odaqtasymyzda ne bolyp jatqanyn jaqsy túsinýimiz kerek», - dep qorytyndylady L. Mlechın.
«Tragıcheskıı ıanvar. Prezıdent Tokaev ı ızvlechenıe ýrokov» kitabynyń tanystyrylymyna Qazaqstan men Reseı Elshilikteriniń dıplomattary, sondaı-aq Reseı ǵylym jáne saraptama qoǵamdastyǵynyń ókilderi qatysty.