Máskeýde Qazaqstannyń Táýelsizdik kúnine oraı saltanatty shara ótti
Reseı astanasynyń «Lotte Moskva» atty qonaq úıinde Qazaqstan Respýblıkasynyń Táýelsizdik kúnine arnalǵan saltanatty qabyldaý keshi ótti. Osy keshtiń mártebeli meımandarynyń arasynan Reseı Federatsııasy prezıdent ákimshiligi, úkimettiń jáne Syrtqy ister mınıstrliginiń ókilderi, álemniń túkpir-túkpirinde ornalasqan memleketterdiń dıplomatııalyq korpýs jetekshileri jáne halyqaralyq uıymdar, ǵalymdar men mádenıet qaıratkerleri, tanymal qazaq-reseı juldyzdary jáne qazaq dıasporasynyń ókilderi boldy.
Dástúr boıynsha kesh Qazaqstan Respýblıkasynyń Reseı Federatsııasyndaǵy Tótenshe jáne Ókiletti Elshisi Imanǵalı Tasmaǵambetovtiń saltanatty quttyqtaýymen ashyldy. Ol óz sózinde otanymyzdyń táýelsizdik tuǵyryn 28 jyl ishinde barlyq álemdik qaýymdastyq jáne etnostar ókilderi moıyndaǵanyn atap ótti. Onyń sózinshe, Qazaqstandy shet elderde toleranttylyqqa, konfessııalyq jáne mádenıaralyq kelisimge qol jetkizýge baǵyttalǵan dáıekti ishki saıasat júrgizetin memleket dep biledi.
«Qazaqstan josparlanǵan ekonomıkadan básekege qabiletti naryqtyq ekonomıkaǵa kóshý úrdisin sátti ótkizdi jáne bul júıeniń barlyq tetikteri men zańnamalyq negizderin qurastyra bildi. Qazaqstan eýrazııalyq keńistiktegi ıntegratsııanyń lokomotıvi bolyp tabylady. Elimizdiń qarqyndy damýy memleketke ómirdiń barlyq salalaryn odan ári reformalaýǵa múmkindik beredi», - dep atap ótti dıplomatııalyq mıssııanyń basshysy.
Sóziniń sońynda ol Qazaqstan halqyn Táýelsizdik kúnimen quttyqtap, barlyǵyna baqyt pen zor densaýlyq tiledi.Óz kezeginde Reseı Federatsııasy Syrtqy ister mınıstriniń orynbasary Aleksandr Pankın búgingi tańda Qazaqstan damyǵan ekonomıkasy men halyqtyń ómir súrý deńgeıi, mádenı kelbeti aıqyn, zamanaýı, demokratııalyq, kópultty memleket ekendigine nazar aýdardy.
«Reseı men Qazaqstan halyqtary tatý kórshiler retinde ómir súrip, ekonomıkalyq jáne áleýmettik damý máselelerin birlese sheshedi, týyndaǵan qıyndyqtardy birge jeńedi. Baýyrlas Qazaqstan halqyna barlyq jaqsylyqtardy tileımin», - dep qorytyndylady Aleksandr Pankın.
Sonymen qatar, bul keshte ár jerden Qazaqstan halqyna joldanǵan quttyqtaýlar estildi. Saıasattanýshy, Kaspıı yntymaqtastyǵy ınstıtýtynyń dırektory Sergeı Mıheev táýelsiz Qazaqstannyń basty jetistigi - bul kedergisiz turaqty damý ekenine senim bildirdi.
«Bizdiń qıyn-qystaý kezeńimizde úzdiksiz alǵa qadam basý – onyń ózi úlken jetistik. Qıyndyqsyz turaqty damýdy qamtamasyz etetin Qazaqstan úshin bul postkeńestik keńistiktegi jáne odan tys aımaqtar úshin de sátti úrdis. Sondyqtan men Qazaqstan halqyn merekemen quttyqtaımyn jáne barlyǵyńyzǵa jaqsylyq tileımin».
Maqtan tutar azamattarymyzdyń biri, kınorejısser Tımýr Bekmambetov te óz jerlesterin merekemen quttyqtady.
«Týǵan jerimde bolmaǵanym úshin ókinemin, biraq janymmen árqashan sizdermen birgemin. Barlyqtaryńyzǵa tek sáttilik tileımin, al qalǵanyn adamdar ózderi sheshedi» - dedi ol.
Saltanatty qabyldaý barysynda qonaqtar tek pikir almasyp qana qoımaı, sonymen birge birneshe saǵat boıyna Qazaqstanǵa saıahatqa shyǵa aldy. Mundaı múmkindikti qonaqtarǵa Serik Zakarııa jetekshilik etetin «Araıly Aqtóbe» folklorlyq ansambliniń ártisteri, qazaqstandyq sýretshiler men áıgili músinshi Marat Ǵabdrahmanovtyń kórmesi syı etti.
Іs-sharanyń sharyqtaý shegi qazaqtyń ulttyq taǵamdarymen tanysý boldy. Qonaqtarǵa túrli taǵamdar men sýsyndar usynyldy. Sondaı-aq, kesh qonaqtarynyń bári fotosessııaǵa qatysty.